Published:Updated:

காதல் கோட்டை! #VikatanReview

விகடன் விமர்சனக்குழு

இப்படியொரு திரைக்கதையை நாம் ஆர்வத்தோடு ஆர்ப்பரிக்காமல் என்ன செய்வது!

காதல் கோட்டை
காதல் கோட்டை
(28.07.1996 தேதியிட்ட ஆனந்த விகடன் இதழின் அட்டைப்படம்!)

`நீ இங்கு நலம்... நான் அங்கு நலமா?!'

சில சமயம், ஆர்ப்பாட்டமான வாணவேடிக்கைகளைவிட, மிக எளிமையாக ஒளிவீசும் ஒரு மெழுகுவத்தி நம் மனதை அள்ளிக்கொண்டு போய்விடுவது உண்டு. அந்த வகையில் அவ்வப்போது தென்றலாக வந்து வருடிவிட்டுப் போகிற திரைப்படங்களும் உண்டு. காதல் கோட்டை மெழுகுவத்தி வகை!

காதல் என்கிற மகத்தான சக்தியால் பின்னிப் பிணைந்து கட்டுண்ட இருவர் கடைசிவரை தங்களுக்குள் நேரில் அறிமுகமாகாமலே இருப்பது என்பது ஆச்சரியமான ஒரு கரு. அந்தக் கருவுக்கு வெற்றிகரமாக உருவம் கொடுத்து உயிரோட்டத்துடன் நடமாடவிட்டால் நாம் ஆர்வத்தோடு ஆர்ப்பரிக்காமல் என்ன செய்ய?

காதல் கோட்டை
காதல் கோட்டை

ஜெய்ப்பூரில் தனக்குக் கிடைத்த புது வேலையில் சேர, சென்னை சென்ட்ரல் ஸ்டேஷனிலிருந்து கிளம்புகிற அஜீத்துக்கு ரயிலில் கிடைக்கிறது அந்தக் கைப்பை. வேலை தேடும் யாரோ ஒரு பெண்ணின் சர்டிபிகேட்டுகள் அதில் இருப்பதைப் பார்த்துப் பரிதாபப்பட்டு அந்த விலாசத்துக்கு பார்சலில் அனுப்பி வைக்கிறார்.

நம்பிக்கை இழந்த தேவயானி, பத்திரமாக வந்து விட்ட தன் சர்டிபிகேட்டுகளைப் பார்த்துக் கண்ணீர் தளும்ப பரவசம் அடைகிறார். முகம் தெரியாத அஜீத் மீது அவருக்கு இனம்புரியாத பற்றுதல் உண்டாக இதுவே போதுமானதாக இருக்க, கடிதத் தொடர்பு வளர... படிப்படியாக அது காதலாக பிரமாண்ட வடிவம் எடுக்கிறது.

`இது என்ன கதை... இப்படியெல்லாம் கூட நடக்குமா?' என்ற கேள்வியை தியேட்டரில் யாரேனும் எழுந்து கேட்டால் தர்ம அடி விழும் ஆபத்துகூட உண்டு. `பரவசமான சஸ்பென்ஸ்' என்கிற உணர்வு ஆடியன்ஸைத் தொற்றிக் கொண்டு விடுவதுதான் காரணம்!

இந்தப் படத்தில் வரும் எல்லாரும் நல்லவர்கள். சராசரி மனிதர்கள். இதனால், அவ்வப்போது தலைதூக்கும் நமது ஃபார்முலா ஊகங்களை இந்தப் படம் உடைத்துக்கொண்டு போகும் போதெல்லாம் ஏற்படுவது இன்ப அதிர்ச்சிகளே!

ஹோல்டரில் பல்பு பொருத்துவது போல் கச்சிதமாகப் பொருந்துகிற ரோல் அஜீத்துக்கு. இயக்குநர் `ஸ்விட்ச்'சைத் தட்டியவுடன் படம் முழுக்கப் பிரகாசிக்கிறார் அவர். இறுதிக் காட்சியில், `நடப்பது என்ன?' என்று எதுவும் புரியாமல் சற்றே குழப்பத்தை அவர் காட்டி அடக்கி வாசித்திருப்பது மிருதுவான நடிப்பு!

மனதில் உறுதியும் முகத்தில் அப்பாவித் தனமுமாக வரும் தேவயானி காரெக்ட்ரைப் பார்க்கும்போது, `நாமும் வீட்டிலிருந்து எழுந்து சென்று இந்தப் பெண்ணின் காதலுக்கு ஏதாவது உதவ வேண்டும்' என்ற தவிப்பு எழுகிறது.

ஹீரா
ஹீரா

அஜீத்தின் கோடீஸ்வர முதலாளியாக ஹீராவைப் போட்டு, அஜீத்தை விடாப்பிடியாகத் துரத்த வைத்திருக்கிறார்கள். தனது அன்பை ஹிஸ்டீரிகலாக அஜீத்திடம் வெளிப்படுத்தும் இடத்தில் `ஒலிம்பிக் சாம்பியனா'க வெல்கிறார் ஹீரா.

இப்படிப்பட்ட ஒரு கதையை எடுத்துக் கொண்டு, ஆதற்கு ஆரம்ப காட்சிகளை அமைக்கும்போது, எச்சரிக்கையான `நகாசு' வேலைகள் தேவைப்படுகின்றன. வரப்போகிற கதைக்கு `முன்னுரை'தான் என்று புரிந்துவிடுவதால், இருப்பதை ரசிப்பதைவிட வரப்போவதை நாம் எதிர்பார்க்கத் துவங்கிவிடுவது ஒரு முக்கிய குறை! இதனால்தான், ரொம்ப அக்கறையோடு போடப்பட்ட பாடல் காட்சிகள்கூட நம்மைக் கொஞ்சம் பொறுமை இழக்கச் செய்கின்றன.

சின்னச் சின்ன குறைகள் இந்தப் படத்தில் இருக்கலாம் . அவற்றையெல்லாம் புத்திசாலித்தனமாகப் பட்டியல் போட்டு மெனக்கெடுவது அவசியமில்லாத வேலை. ஏனென்றால், காதல் சந்நிதிக்கு ஒரு தனி மரியாதையும் சக்தியும் (திரையுலகிலும்) உண்டு. அந்த சக்தியை இந்தப் படம் மிகப் பெரிய அளவில் காட்டியிருக்கிறது.

தங்கர்பச்சானின் காமிரா - இத்தனை நாள் பார்க்காத ஜெய்ப்பூரின் அழகை ஒட்டுமொத்த அழகோடு அள்ளிக் கொண்டு வருகிறது... ஆட்டோக்களின் நடுவில் நடக்கும் ஆக்ரோஷ சண்டையில் துள்ளிக்கொண்டும் பயணிக்கிறது!

காதல் கோட்டை
காதல் கோட்டை

தேவா இசையில் மூன்று பாடல்கள் தென்றலான இன்னிசை!

மணிவண்ணன், விஜய், கரண், ராஜீவ் மற்றும் பாண்டு இந்தக் காதல் கதையை வெற்றிகரமாகத் தூக்கிவிட கச்சிதமாகப் பயன்படுத்தப்பட்டிருக்கும் எஸ்கலேட்டர்கள். க்ளைமாக்ஸில் வரும் மகத்தான மழையும்தான்!

கொட்டுகிற மழையில் - ஆட்டோவில் - ஒருவரையொருவர் யாரென்றே தெரிந்து கொள்ளாமல் டிரைவரும், பாஸஞ்சருமாகக் காதலர்கள் பயணிக்க, முதல் தர சஸ்பென்ஸ் படங்களுக்கு இருக்கிற பரபரப்பை இந்தக் காதல் கதையின் உச்சகட்ட நிமிடங்களில் கொண்டு வந்திருப்பதன் மூலம் அனாயாசமாக ஒரு காதல் கோட்டையை எழுப்பி அதன்மேல் வெற்றிக்கொடியை அழுத்தமாக நாட்டியிருக்கிறார் இளம் டைரக்டர் அகத்தியன்.

- விகடன் விமரிசனக் குழு

(28.07.1996 தேதியிட்ட ஆனந்த விகடன் இதழிலிருந்து...)
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு