Published:Updated:

கேன்ஸ் முதல் நியூயார்க் வரை... யூடியூபில் இணையும் திரைப்பட விழாக்கள்! - சினிமா பிரியர்களே ரெடியா?

Film Festival
Film Festival

யூடியூப் தளத்தில் இலவசமாக திரையிடப்படும் உலக சினிமாக்களை கண்டுகளிக்கும் அதேவேளையில் பார்வையாளர்கள் உலக சுகாதார நிறுவனத்துக்கு நிவாரணமும் அளிக்கலாம். என்ன உலக சினிமா பிரியர்களே, ரெடியா?

கொரோனா வைரஸால் பாதிக்கப்பட்ட துறைகளில் சினிமாத்துறையும் முதன்மையானது. படப்பிடிப்பு ரத்து, திரையரங்குகள் மூடல் என முடங்கிப்போய் கிடக்கிறது. உலக அளவில் பெயர் பெற்ற, திரைப்பட விழாக்களும் இந்த ஆண்டு நடைபெறுமா எனத் தெரியவில்லை. ஆஸ்கர் கமிட்டி, அதன் முக்கியமான விதியையே தளர்த்தியிருக்கிறது. இந்தப் பெரும் வேதனைக்கு, சிறு ஆறுதலாக வந்திருக்கிறது ஓர் அறிவிப்பு!

Film Festival
Film Festival

அமெரிக்காவைச் சார்ந்த ட்ரிபெக்கா எனும் ஊடக நிறுவனம், யூடியூப் நிறுவனத்துடன் இணைந்து `We are one: A global film festival’ என்ற பெயரில் உலகளாவிய திரைப்பட விழா ஒன்றை இணையத்தில் நடத்தப்போவதாக அறிவித்துள்ளது. பெர்லின், சிட்னி, டோக்யோ, டொரோண்டோ, ட்ரிபெக்கா, சுன்டன்ஸ், வெனிஸ், நியூயார்க், கேன்ஸ், மும்பை ஆகிய நகரங்களில் ஆண்டுதோறும் நடைபெறும் உலகின் புகழ்பெற்ற திரைப்பட விழாக்களுடன் இணைந்து நடைபெற இருப்பதாகவும், இந்த ஆன்லைன் திரைப்பட விழாவானது மே 29-ம் தேதி தொடங்கி 10 நாள்கள் நடைபெறும் என்றும் தெரிகிறது.

மேலும் ட்ரிபெக்கா நிறுவனத்தின் நிறுவனர்களில் ஒருவரான ஜேன் ரோசென்தெல் கூறுகையில், ``நம்மிடையே இருக்கும் வேறுபாடுகள் மற்றும் எல்லைகளைத் தாண்டி உலக மக்களை ஒன்றிணைக்கும் மிக சக்திவாய்ந்த கருவி சினிமா. தற்போதைய சூழ்நிலையில் உலகமே ஒன்றிணைந்து குணமடைய வேண்டும். உலகம் முழுவதும் இருக்கும் திரைப்படக் கலைஞர்கள் மற்றும் கதை சொல்லிகள் அனைவரும் ஒன்றிணைந்து தற்போதைய பேரிடர் காலத்தில் மக்களை மகிழ்விப்பது மட்டுமல்லாமல் பாதிக்கப்பட்டவர்களுக்கு நிவாரணம் சேகரிக்கும் வகையிலும் இந்த இணையதள திரைப்பட விழா வழி செய்யும்” எனத் தெரிவித்துள்ளார்.

Film Festival
Film Festival

சக நிறுவனரும் பிரபல நடிகருமான ராபர்ட் டி நீரோ கூறுகையில், "இது கலைஞர்களையும் கதை சொல்லிகளையும் ஓரிடத்தில் இணைத்து, கொடுமையான இச்சூழலில் மக்களை மகிழ்விக்க செய்யும்" என்றார்.

யூடியூப் தளத்தில் இலவசமாகத் திரையிடப்படும் உலக சினிமாக்களைக் கண்டுகளிக்கும் அதேவேளையில் பார்வையாளர்கள் உலக சுகாதார நிறுவனத்துக்கு நிவாரணமும் அளிக்கலாம். என்ன உலக சினிமா பிரியர்களே, ரெடியா?

அடுத்த கட்டுரைக்கு