* விக்ரம் மற்றும் அவரின் மகன் துருவ் சேர்ந்து நடிக்கும் கார்த்திக் சுப்புராஜின் படம், மதுரை கேங்ஸ்டர் ஒருவரின் உண்மைக் கதையை அடிப்படையாகக் கொண்டதாம். படத்துக்கான ப்ரீ புரொடக்‌ஷன் வேலைகள் தொடங்கியிருக்கும் நிலையில், அப்பாவுக்கும் - மகனுக்குமான ஹீரோயின் தேடல் தீவிரமாக நடக்கிறது. விக்ரமுக்கு ஜோடியாக நடிக்க த்ரிஷாவிடம் பேச்சுவார்த்தை நடக்கிறதாம்.

* ‘தலைவன் இருக்கின்றான்’ படப்பிடிப்பே ஆரம்பிக்கவில்லை. ஆனால், படத்துக்கான புரொமோஷன் வேலைகளை ஆரம்பித்துவிட்டார் கமல்ஹாசன். முதலில் விஜய்சேதுபதி, அடுத்து ஏ.ஆர்.ரஹ்மான் என லைவ் உரையாடல்களை நிகழ்த்திவரும் கமல், அடுத்து வடிவேலுவுடன் இன்ஸ்டாகிராம் லைவில் கலந்துரையாட இருக்கிறாராம். ‘இப்போதைக்கு அரசியல் பேச்சுகள் வேண்டாம்’ என்கிறாராம் வடிவேலு.

* நடிகைகளுக்குள் சம்பளப் போட்டியைவிட, ‘இன்ஸ்டாகிராமில் அதிக ஃபாலோயர்களைக் கொண்டிருப்பது யார்?’ என்கிற போட்டிதான் உச்சத்தில் இருக்கிறது. இதில் எல்லா நடிகைகளையும்விட லீடிங்கில் போய்க்கொண்டிருக்கும் ஸ்ருதி ஹாசன் 1,40,00,000 ஃபாலோயர்களைத் தாண்டியிருக்கிறார். சமந்தா ஒரு கோடி ஃபாலோயர்ஸ் என்ற எண்ணிக்கையைத் தாண்டியிருக்கிறார்.

* பள்ளிகளில் ஆன்லைன் வகுப்புகள் தொடங்கியிருப்பதற்கு கண்டனங்களைத் தெரிவித்திருக்கிறார் நடிகரும் இயக்குநருமான ஆர்.ஜே.பாலாஜி. ‘‘கடந்த சில வாரங்களாக சின்னக் குழந்தைகளுக்கும் ஆன்லைனில் எட்டு மணி நேர வகுப்புகள் நடக்கின்றன. பெரியவர்களே நீண்ட நேரம் தொடர்ந்து கம்ப்யூட்டர் ஸ்கிரீனைப் பார்த்தால் கண் பார்வையில் பிரச்னை வரும்போது, குழந்தைகளுக்கு வராதா... தவிர அனைவரின் வீட்டிலும் கம்ப்யூட்டர் இருக்குமா, அப்படியிருந்தாலும், இரண்டு குழந்தைகள் இருந்தால் என்ன செய்வது?’’ என அறச்சீற்றத்தை வெளிப்படுத்தியுள்ளார் பாலாஜி.

* சீரியல் படப்பிடிப்புகள் ஆரம்பிக்க அனுமதி கிடைத்துவிட்டாலும் முக்கியமான சேனல்கள் படப்பிடிப்புகளைத் தொடங்கவில்லை. ‘ஸ்பாட்டில் இருப்பவர்கள் எல்லோருக்கும் இன்ஷூரன்ஸ் எடுக்க வேண்டும். கொரோனாவால் உயிரிழப்பு ஏற்பட்டால் 40 லட்சம் ரூபாய் வரை இழப்பீடு தர வேண்டும்’ என்று சொல்லப்பட்டிருப்பதால், பல தயாரிப்பு நிறுவனங்கள் படப்பிடிப்பைத் தொடங்குவதில் தயக்கம் காட்டுகின்றனவாம்.