மிஸ்டர் மியாவ்

*ஓ.டி.டி-யில் இதுவரை வெளியாகியிருக்கும் படங்கள் சுமாராக இருப்பதோடு, எதிர்பார்த்த அளவுக்கு மக்களிடம் ரெஸ்பான்ஸும் இல்லை என்பதால் தியேட்டர் ஓனர்கள் மகிழ்ச்சியில் இருக்கிறார்களாம். அதேசமயம், ‘முதலுக்கு மோசமில்லை’ என்கிற அளவுக்கு தற்போது வருமானம் வந்துவிடுவதால், தமிழ்ப் படங்களை வாங்குவதற்கு ஓ.டி.டி நிறுவனங்கள் தொடர்ந்து ஆர்வம் காட்டிவருகின்றன. ‘போகப்போக ஓ.டி.டி-யே வெல்லும் என்பதும் அவர்களின் அசைக்க முடியாத நம்பிக்கை. அதேபோல, தயாரிப்பாளர்கள் தரப்பிலும், ‘ஓரளவுக்கு லாபம் வந்தால் போதும்’ என்று தற்போதைக்கு ‘ஓ.டி.டி-யே சரணம்’ என்று தயாராகவே இருக்கிறார்கள்.

* எல்லோரும் ஷூட்டிங் போய்க்கொண்டிருந்த காலத்தில், முழு ஓய்வில் இருந்த சிம்பு, எல்லோரும் ஊரடங்கில் அமைதியாக இருக்கும்போது செம பரபரப்பில் இருக்கிறார். இந்த ஊரடங்கின்போது வீட்டில் இருந்தபடியே கௌதம் மேனனின் குறும்படத்தில் நடித்த சிம்பு, அடுத்தடுத்து இயக்குநர்களிடம் கதை கேட்டுக்கொண்டிருக்கிறார். ஊரடங்கு முடிந்ததும் ‘மாநாடு’, ‘மஃப்டி’, விஜய்சந்தர் இயக்கத்தில் ஒரு படம், மிஷ்கின் இயக்கத்தில் ஒரு படம் என சிம்பு செம பிஸி!

* பெரிய நடிகர்களின் படங்களெல்லாம் தியேட்டரில் மட்டுமே ரிலீஸ் என்று கறாராக இருந்த சூழல் மெள்ள மாற ஆரம்பித்திருக்கிறது. முதல் ஆளாக தனுஷ் இந்த ஆட்டத்தை ஆரம்பித்துவைக்கவிருக்கிறார். அவருடைய ‘ஜெகமே தந்திரம்’ ஜூலை இறுதியில் அமேஸானில் ரிலீஸ் ஆகலாம் என்கிறார்கள். அப்படி ரிலீஸ் ஆனால், ‘ஓ.டி.டி-யில் முதலில் ரிலீஸ் ஆன கொஞ்சம் பெரிய பட்ஜெட் படம்’ இதுவாகத்தான் இருக்கும்.

* டி.வி சீரியலுக்கு வருகிறார் `பிக்பாஸ்’ புகழ் ‘இருட்டு அறையில் முரட்டு குத்து’ நடிகை யாஷிகா ஆனந்த். பிரபல சீரியலில் வில்லியாக நடிக்கவிருக்கும் யாஷிகாவுக்கு ஒரு எபிசோடில் நடிக்க ஒன்றரை லட்சம் ரூபாய் சம்பளம் பேசப்பட்டிருக்கிறதாம்.

* ‘மாஸ்டர்’ படத்தின் இணைத் தயாரிப்பாளர்களில் ஒருவரான லலித்குமார் அடுத்தடுத்து பல படங்கள் தயாரித்துவருகிறார். `இவர், நடிகர் விஜய்க்கு மிகவும் நெருக்கமானவர்’ என்கிறார்கள். விஜய்யின் கல்யாண மண்டபம், ஷாப்பிங் காம்ப்ளெக்ஸ் அனைத் தையும் ஒப்பந்த அடிப்படையில் இவர்தான் நடத்திவருகிறாராம்.