தொலைந்துபோன சகோதரனைத் தேடும் டெம்ப்ளேட் கதையில், ஜீத்து ஜோசப் ஸ்டைல் த்ரில்லர் திரைக்கதையைக் கலந்தால், ‘தம்பி.’

மேட்டுப்பாளையத்தின் முக்கிய அரசியல்வாதி சத்யராஜுக்கு அளவான குடும்பம்; ஆயிரம் ஏக்கர் சொத்து. சிறுவயதிலேயே மகன் தொலைந்துபோய்விட, மொத்தக் குடும்பமும் சோகத்திலேயே காலத்தைக் கடத்துகிறது. 15 ஆண்டுகளுக்குப் பின் கோவாவில் சின்னச் சின்னத் திருட்டுகளில் ஈடுபட்டுவரும் கார்த்திதான் சத்யராஜின் மகன் எனக் காவல்துறை கண்டுபிடிக்க, மகனை வீட்டுக்கு அழைத்துவருகிறார் சத்யராஜ். அவர்தான் உண்மையில் காணாமல்போன அந்த இளைஞனா, இல்லையா என்பதில் சிலருக்குச் சந்தேகம். 15 ஆண்டுகளுக்கு முன்பும் சமகாலத்திலும் நடக்கும் பல சிக்கல்களின் முடிச்சுகளை அவிழ்க்கிறான் ‘தம்பி.’

அலட்டிக்கொள்ளாத ‘டோன்ட் கேர்’ ஹீரோவாய் காமெடி கலந்து நடிப்பது கார்த்திக்கு பக்கெட் பிரியாணி சாப்பிடுவதுபோல... பிரித்து மேய்கிறார். இவரின் எனர்ஜிதான் படத்தை அடுத்தடுத்த கட்டங்களுக்கு நகர்த்துகிறது. பாசக்கார - கோபக்கார அக்காவாக ஜோதிகா. காட்சிகள் குறைவென்றாலும் முகத்தில் மிளிரும் உணர்ச்சிக் கலவை திரையில் தெறிக்கிறது.

கார்த்திக்கு ஜோடியாய் வரும் நிகிலா விமலுக்கு ஹீரோவைச் சுற்றிச் சுற்றி வரும் அதே பழைய கேரக்டர். கிடைக்கும் இடைவெளிகளிலெல்லாம் அசத்தி, மிரட்டுகிறார் சத்யராஜ். சீதா, இளவரசு, பாலா, ஹரீஷ் பெராடி என மற்ற கேரக்டர்களும் பக்கா பொருத்தம்.