Vikatan.com

www.vikatan.com would like to send you push notifications.

Notifications can be turned off anytime from browser settings.

குஷ்பு என்னும் துணிச்சல் நாயகி! #HBDKhushbu

குஷ்பு

Chennai: 

தமிழ் சினிமாவில் நாயகர்கள் கொண்டாடப்பட்ட அளவுக்கு நாயகிகள் கொண்டாடப்படுவது அரிதினும் அரிது. ஆண்களால் ரசிக்கப்படுவதற்காக ஆண்களால் உருவாக்கப்படும் ஆண்கள் சினிமாவாகவே தமிழ் சினிமா இருக்கிறது. துவக்கக் காட்சி அறிமுகம் முதல் பட டைட்டில் வரை நாயகர்களை மையப்படுத்தியே தமிழ் சினிமா அமைந்திருக்கும். தமிழ் ரசிகர்களால் நடிகர்கள் அளவுக்குக் கொண்டாடப்பட்ட நடிகைகளை விரல்விட்டு எண்ணக்கூடத் தேவையில்லை, அவ்வளவு சொற்பம். தமிழ் சினிமா ரசிகர்களால் கொண்டாடப்பட்ட மிகச்சில நடிகைகளில் குஷ்புவும் ஒருவர். பொதுவாக தமிழ் சினிமாக்களில் ஹீரோக்களைப் புகழ்வதுபோலவே பாடல்கள் அமைக்கப்பட்டிருக்கும். ஆனால் 'அண்ணாமலை' படத்தில் 'கொண்டையில் தாழம்பூ..நெஞ்சிலே வாழைப்பூ...கூடையில் என்ன பூ? குஷ்பு!" என்று ஒரு பாடல் அமைக்கப்பட்டது குஷ்புவுக்குக் கிடைத்த வெற்றியின் அடையாளம். குஷ்புவின் புகழ் பாடுவதற்காக ஒரு பாடல் உருவாக்கப்பட்டது ஓர் அதிசயம் என்றால், அது ரசிக வழிபாட்டில் உச்சநிலையை அடைந்த ரஜினியின் படத்திலேயே அமைந்ததும் அவரே அதற்கு வாயசைத்ததும் இன்னொரு அதிசயம். அதேபோல் 'கேப்டன் மகள்' படத்தில் 'எந்தப் பெண்ணிலும் இல்லாத ஒன்று...' என்ற பாடலில் வருணிக்கப்பட்டது நாயகி பாத்திரம் என்று கருதப்பட்டாலும் உண்மையில் அது குஷ்புவைக் கொண்டாடுவதாகவே கருதி ரசிக்கப்பட்டது. பொதுவாக நடிகைகளின் நடையுடை அலங்காரங்கள் ரசிக்கப்படுவதும் அதையொட்டி புதிய ஃபேஷன்கள் உருவாவதும் இயல்புதான். வாணிஶ்ரீ கொண்டை முதல் நதியா தோடு வரை தமிழகத்தில் ஃபேஷன் ஆனது. இவையெல்லாம் சினிமாக்களில் நடிகைகள் பயன்படுத்தியது. ஆனால் சினிமாவுக்குச் சம்பந்தமில்லாத 'இட்லி'க்குக் குஷ்பு என்று பெயர் சூட்டப்பட்டது குஷ்பு ஒருவருக்குத்தான்.

யோசித்துப் பார்த்தால் குஷ்பு ஒன்றும் அவ்வளவு சிறந்த நடிகையில்லை. அவரது நடிப்புக்காகவே கொண்டாடப்பட்ட படமென்று எதுவுமில்லை. விஜயசாந்தி, நயன் தாரா, ஜோதிகாவைப் போல நாயகிக்கு முக்கியத்துவம் தரும் படங்களில் அவர் நடித்ததுமில்லை; அதற்காக அவர் மெனக்கெட்டதுமில்லை. குஷ்பு ஓர் அழகுப்பதுமையாகத்தான் பார்க்கப்பட்டார். அழகின் உதாரணமாக அவர் கருதப்பட்டார். அவரைத் தமிழர்கள் கொண்டாடியதன் உச்சம், குஷ்புவுக்குக் கோயில் கட்டப்பட்டதாகக் கிளம்பிய செய்தி. தமிழ் சினிமா வரலாற்றில் குஷ்பு அளவுக்குக் கொண்டாடப்பட்ட நடிகையை அதற்கு முன்பும் பார்த்ததில்லை; இதுவரையிலும் கண்டதுமில்லை. தமிழர்களால் குஷ்பு கொண்டாடப்பட்டது வரலாறு என்றால் அவர் சர்ச்சைகளில் சிக்கி வசைபாடப்பட்டதும் வரலாறுதான்.

குஷ்பு

ஒரு மாத இதழ் எய்ட்ஸ் விழிப்பு உணர்வு குறித்த கட்டுரையை வெளியிட்டபோது, பல பிரபலங்களிடம் கருத்து கேட்டதைப்போல் குஷ்புவிடமும் கருத்து கேட்டது. 'திருமணத்துக்கு முன்பு பாலுறவு கொள்ள நேரிட்டால், பாதுகாப்பாக இருப்பது முக்கியம்' என்ற கருத்தைக் குஷ்பு தெரிவித்தார். குஷ்பு ஏதோ சொல்லக்கூடாததைச் சொன்னதைப்போல சர்ச்சை பரவியது. அதுதொடர்பாக ஒரு நாளிதழ் நிருபர் குஷ்புவைத் தொடர்புகொண்டு கேட்டபோது, " தமிழகத்தில் திருமணத்துக்கு முன்பு பாலுறவு கொள்பவர்களே இல்லையா?" என்று குஷ்பு சொன்னதாக, செய்தி வெளியானது. 'தமிழ்ப்பெண்களையே கற்பில்லாதவர்கள்' என்று குஷ்பு சொல்லிவிட்டார் என்று பலத்த எதிர்ப்புகள் கிளம்பின. இப்போது அரசியலில் எதிரும் புதிருமாக நிற்கும் விடுதலைச் சிறுத்தைகளும் பாட்டாளி மக்கள் கட்சியும் அப்போது ஒன்றிணைந்து குஷ்புவுக்கு எதிராகப் போராட்டங்களை நடத்தினர். தமிழ்த்தேசியம் பேசுபவர்களும் குஷ்புவுக்கு எதிராக அணிதிரண்டனர். இத்தனைக்கும் 'கற்பு' என்ற கருத்தாக்கம் குறித்து தீவிரமான விமர்சனங்களைச் சந்தித்த மண் தமிழகம்.

'கற்பு என்பதும் கற்பிதம்; விபச்சாரம் என்பதும் கற்பிதம்' என்றவர் பெரியார். ''ஆண்கள் இரண்டு ஆசைநாயகிகளை வைத்துக்கொண்டால் பெண்கள் மூன்று ஆசைநாயகர்களை வைத்துக்கொள்ள வேண்டும்" என்றும் சொன்னவர் அவரே. 'கற்பு' என்னும் வார்த்தையே பெண்களை ஏமாற்றுவதற்கும் அடிமைப்படுத்துவதற்கும் ஆண்கள் உருவாக்கிய அயோக்கியத்தனம் என்ற தீவிர சிந்தனையாளர் பெரியார். நியாயமாகப் பார்த்தால், திராவிடர் கழகம் குஷ்புவுக்கு ஆதரவாக நின்றிருக்கவேண்டும். ஆனால் திராவிடர் கழகம் குஷ்புவுக்கு எதிராக எழுந்த எதிர்ப்புகள் குறித்துக் கள்ளமவுனம் சாதித்தது. தி.மு.க. தலைவர் கருணாநிதியோ "பெரியார் ஆண்கள், பெண்கள் இருவருக்குமே கற்பு அவசியம் என்று சொன்னார்" என்று மழுப்பினார். அதற்கு முன்பு இயக்குநர் தங்கர்பச்சான் நடிகைகள் குறித்து ஆணாதிக்க ஆணவத்துடன் ஒரு கருத்தைத் தெரிவித்திருந்தார். அப்போது அவருக்குக் கடும் எதிர்ப்பைக் காட்டி, அவரை மன்னிப்பு கேட்க வைத்தவர்களில் குஷ்புவும் ஒருவர். தமிழ்த்தேசியம் என்ற பெயரில் ஆணாதிக்க மதிப்பீடுகளை நியாயப்படுத்தும் பல தமிழ் சினிமாக்காரர்கள் இந்தச் சந்தர்ப்பத்தைப் பயன்படுத்திக் குஷ்புவை வசைபாடித் தீர்த்தனர். பெரியார் திராவிடர் கழகம் போன்ற சில அமைப்புகளும் அ.மார்க்ஸ் போன்ற மிகச்சில சிந்தனையாளர்களுமே அப்போது குஷ்புவுக்கு ஆதரவாக நின்றனர். இவர்கள் ஆதரவு தெரிவித்தது குஷ்பு கூட அறியாத அளவுக்கு, மிகச் சிறுபான்மை செல்வாக்குகொண்ட கருத்தியல் வட்டத்தினர் அவர்கள். ஏதோஒருவகையில் பெரியாரை அடையாளமாகப் பயன்படுத்திக்கொண்ட பாட்டாளி மக்கள் கட்சி, விடுதலைச் சிறுத்தைகள், திராவிடர் கழகம், தி.மு.க. என அனைவருமே பெரியாரின் சிந்தனைகளுக்கு எதிராக, குஷ்புவுக்கு எதிராக நின்றனர், அல்லது ஆதரவாக நிற்கத் தவறினர். 

குஷ்பு

துடைப்பமும் செருப்புமாகப் போராட்டங்கள் நடத்தப்பட்டன. தமிழகமெங்கும் பல நீதிமன்றங்களில் குஷ்புவுக்கு எதிராக வழக்குகள் தொடுக்கப்பட்டன. அத்தனையையும் தனி மனுஷியாகச் சந்தித்து வழக்குகளில் இருந்து மீண்டார் குஷ்பு. அதற்குப் பின்பும் பல சர்ச்சைகளைச் சந்தித்தவர்தான் குஷ்பு.  ஒரு படவிழாவின்போது கடவுள் சிலை முன்பு கால்மீது கால் போட்டு உட்கார்ந்திருந்தார், கடவுளர்களை இழிவுபடுத்தும்வகையில் ஆடை அணிந்திருந்தார் என்றெல்லாம் அவர்மீது சர்ச்சைகள் கிளப்பப்பட்டன. எல்லா சர்ச்சைகளையும் அவர் தனிமனுஷியாகச் சந்தித்தார். துணிச்சல் என்ற ஒரே ஓர் ஆயுதம்தான் குஷ்புவிடம் இருந்தது. குஷ்பு ஒரு சாகச நாயகியாக சினிமாவில் நடிக்காமல் இருந்திருக்கலாம். ஆனால் நிஜ வாழ்க்கையில் குஷ்பு ஒரு சாகச நாயகிதான்.

'அரசியலுக்கு வருவேன்; வரமாட்டேன், வந்தாலும் வருவேன், வராமலும் வருவேன்' என்று மற்ற திரைப்பிரபலங்களைப் போல் தயங்கித் தயங்கிக் கருத்து சொன்னவரும் அல்ல குஷ்பு. நேரடியாக அரசியலுக்கு வந்து தி,மு.க.வில் இணைந்தார். தி.மு,க,வுக்காகப் பொதுக்கூட்டம், தேர்தல் பிரசாரம் என்று தன்னை அர்ப்பணித்துக்கொண்டார். இப்போது ஜெயலலிதா இறந்தபிறகுதான் பல திரைப்பிரபலங்கள் துணிச்சலாகக் கருத்து சொல்கிறார்கள், தங்கள் அரசியல் ஆசையையும் வெளிப்படுத்துகிறார்கள். ஆனால் ஜெயலலிதா இருந்தபோதே அவரைக் கடுமையாக விமர்சித்தவர், எதிர்த்துப் பிரசாரம் செய்தவர் குஷ்பு. பல எதிர்ப்புகளைச் சந்தித்த குஷ்புவுக்குத் தி.மு.க.விலும் எதிர்ப்புகள் கிளம்பின. மு.க.ஸ்டாலினுக்கு எதிராகக் குஷ்பு கருத்து தெரிவித்ததாக எழுந்த எதிர்ப்புகளையும் தன் வீட்டின்மீது நடத்தப்பட்ட தாக்குதல்களையும்கூட தன் துணிச்சலின் அடிப்படையிலேயே அவர் எதிர்கொண்டார். பிறகு தி.மு.க.வை விட்டு விலகி காங்கிரஸில் இணைந்தார்.

குஷ்பு

குஷ்புவையும் ஜெயலலிதாவையும் இரண்டு விஷயங்களில் ஒப்பிடலாம். ஜெயலலிதாவும் துணிச்சலின் அடையாளமாகக் கருதப்படுபவர். ஆனால் உண்மையில் ஜெயலலிதாவுக்கு இருந்தது துணிச்சல் அல்ல, அரசியல் ஆணவம். அதனால்தான் பல மக்கள்விரோத நடவடிக்கைகளை மேற்கொண்டார், தன் கட்சிக்காரர்களிடமும் கூட்டணிக் கட்சிக்காரர்களிடம் ஜனநாயக விரோதமாக நடந்துகொண்டார். ஒரு பாசிஸ்டாகவே தன் ஆட்சியை நடத்தினார். ஆனால் குஷ்புவோ துணிச்சலாக இருந்தபோதும் பிறருக்கான சுயத்தை அங்கீகரிக்கத் தவறியவர் அல்ல. ஜெயலலிதாவுக்கும் குஷ்புவுக்கும் இருக்கும் இன்னொரு ஒற்றுமை, பெண் என்பதாலேயே பொதுவெளியில் இழிவுபடுத்தப்படுவது. குஷ்பு தி.மு.க.வில் இருந்தபோது தி.மு.க.வின் எதிரிகள் மிகக் கேவலமான முறையில் குஷ்புவை இழிவுபடுத்தினர். காங்கிரஸ் கட்சியில் சேர்ந்தபிறகு ஒருமுறை விடுதலைப்புலிகளை விமர்சித்தார் என்பதற்காக, சமூகவலைத்தளங்களில் அவர்மீது ஆண் திமிருடன் வைக்கப்பட்ட விமர்சனங்கள் மிக மிக மோசமானவை. இசைப்பிரியாவுக்கு இழைக்கப்பட்ட கொடுமைக்காகக் கொதித்து, கண்ணீர் சிந்தியவர்கள்தான் குஷ்பு குறித்துப் பாலியல்ரீதியான இழிவான சித்தரிப்புகளை முன்வைத்தார்கள். எத்தனை மோசமான விமர்சனங்கள் முன்வைக்கப்பட்டபோதும் அவற்றைப் புகார்களாகச் சொன்னவரில்லை குஷ்பு.  ஆணவக்கொலைகள் தொடங்கி மோடி ஆட்சி வரை துணிச்சலாகத் தன் விமர்சனங்களை சமூகவலைத்தளங்களில் முன்வைக்கிறார்.

இன்னொரு சிறப்பும் குஷ்புவுக்கு உண்டு. 'தான் ஒரு பெரியாரிஸ்ட்' என்று பிரகடனப்படுத்திக்கொண்ட குஷ்பு ஒரு கடவுள் மறுப்பாளர். பொதுவாகத் தமிழ் சினிமாவில் ஆண்களே தங்களை நாத்திகர்களாகவும் பெரியாரிஸ்டாகவும் அறிவித்துக்கொண்டவர்கள். குஷ்புதான் பிரபலமான தமிழ் சினிமா பிரபலங்களில் தன்னைப் பெரியாரிஸ்ட் என்று அறிவித்துக்கொண்டவர். இத்தனைக்கும் அவர் தமிழ் மண்ணின் வேர்கள் அற்றவர். வடநாட்டில் பிறந்து, தமிழ்நாட்டுக்கு வந்து தமிழச்சியாகவே வாழ்ந்து தன்னைப் பெரியாரிஸ்டாகவும் அறிவித்துக்கொண்ட பெருமை குஷ்புவுக்குத்தான் உண்டு. துணிச்சலும் சமத்துவ உணர்வும் கொண்ட குஷ்பு மாதிரியான ஒரு பெண்ணைத்தான் பெரியாரும் கனவுகண்டார்.

குஷ்பு

குஷ்புவிடமிருந்து இப்போதைய தமிழ் சினிமாக்காரர்களும் தமிழக அரசியல்வாதிகளும் கற்றுக்கொள்ள வேண்டிய முக்கியமான நற்பண்புகள் இரண்டு. பொதுவாகத் தனிப்பட்ட வாழ்க்கையில் நெருக்கடி வரும்போதுதான் அரசியலுக்கு வருவதும், அரசியலை விட்டு விலகி ஓடுவதும் சினிமாக்காரர்களின் இயல்பாக இருக்கிறது. ஆனால் குஷ்பு, கற்பு குறித்த சர்ச்சை எழுந்தபோது தனியொரு மனுஷியாகவே அதைச் சந்தித்தார். அவருக்கு எதிராக எழுந்த எதிர்ப்புகள் சாதாரணமானவையல்ல. அவர் நினைத்திருந்தால் ஏதாவது ஓர் அரசியல் கட்சியில் அடைக்கலமாகி, அதை எதிர்கொண்டிருக்கக்கூடும். ஆனால் அவர் அத்தனை பிரச்னைகளையும் சந்தித்து முடித்தபிறகுதான், தி.மு.க.வில் தன்னை இணைத்துக்கொண்டார்.

பொதுவாக அரசியல்வாதிகள் ஒரு கட்சியைவிட்டு விலகிவிட்டால், முன்பு இருந்த கட்சியைப் பற்றிக் கடுமையான விமர்சனங்களை முன்வைப்பது வழக்கம். ஆனால் குஷ்புவோ தி.மு.க.வில் இருந்து விலகி காங்கிரஸில் இணைந்தபிறகும்கூட, இப்போதுவரை தி.மு.க குறித்து எந்தக் குற்றச்சாட்டுகளையும் கூறாதவர். "கலைஞர் என் தந்தையைப் போன்றவர்" என்று சொல்லும் குஷ்பு ஸ்டாலின் மீதும் புகார்கள் கூறியதில்லை. லாவணிக்கச்சேரி நடக்கும் தமிழக அரசியல் சூழலில் குஷ்புவிடம் இருக்கும் இந்த நற்பண்பு, எந்த அரசியல்வாதியிடமும் காணக் கிடைக்காத ஒன்று.

பிறந்தநாள் வாழ்த்துகள் குஷ்பு!

உங்கள் கருத்தைப் பதிவு செய்யுங்கள்

Advertisement
Advertisement
Advertisement

MUST READ

Advertisement

எடிட்டர் சாய்ஸ்