Vikatan.com

www.vikatan.com would like to send you push notifications.

Notifications can be turned off anytime from browser settings.

’எங்க மகன்...’ என எம்.ஜி.ஆர் பெயர் எடுத்தது எப்படி..!? - ஒப்பனையும் ஒரிஜினலும்! எம்.ஜி.ஆர் 100 #MGR100 அத்தியாயம்-8

எம்.ஜி.ஆர்

Chennai: 

இந்தத் தொடரின் முந்தைய அத்தியாயத்தைப் படிக்க இங்கே க்ளிக் செய்யவும்.

தாய்க்குலத்தில் ஏகோபித்த ஆதரவுடன் மூன்று முறை தொடர் வெற்றி பெற்ற எம்.ஜி.ஆர் இயற்கையிலேயே தன் தாய் மீது மிகுந்த பாசம் கொண்டிருந்தைப் போல மற்ற தமிழகத்து தாய்மாரிடமும் அளவற்ற தாய்ப்பாசம் கொண்டிருந்தார். மூதாட்டியர் பலர் அவரைத் தன் மகன் போல அனைத்து கண்ணீர் விட்டு கலங்கி நிற்கும்போது அவர்களின் ஏழ்மைத் தோற்றத்தைக் கண்டு அருவருப்படையாமல் தன் கைக்குட்டையால் கண்ணீரைத் துடைத்து விட்டவர். எம்.ஜி.ஆர்.

எம்.ஜி.ஆர்

முதியோருக்கும் சத்துணவு

எம்.ஜி.ஆர் முதல்வரானதும் சத்துணவு திட்டத்தை அறிமுகப்படுத்தியபோது இது காமராஜர் தொடங்கிய திட்டம் தானே என்று சிலர் விமர்சித்தனர். அப்பனுக்கு சாராயம் பிள்ளைக்கு சத்துணவா? என்று கேட்டனர்.

இவர்களால் சத்துணவின் தன்மை அறியாதோர் என்று திட்டவட்டமாகச் சொல்லாம். எம்.ஜி.ஆர் தொடங்கிய சத்துணவு திட்டத்தில் அப்பகுதியில் வாழும் முதியோருக்கும் மதியஉணவு இலவசமாக சத்துணவு மையத்தில் வழங்கப்பட்டது. முதியோர் உதவித்தொகையும் உயர்த்தித்தரப்பட்டது. யாரும் இல்லாத முதியவர்கள், மருமகளால் விரட்டப்பட்ட முதியவர்கள் இந்த சத்துணவுத் திட்டத்தின் கீழ் மதிய உணவு பெற்றனர். இவர்கள் எம்.ஜி.ஆரை தம் மகனாகக் கருதி வந்தனர்.

இளம் தாய்மாரின் கண்ணீர் துடைத்த எம்.ஜி.ஆர்

இளம் பெண்கள் குழந்தை பெற்று நான்கு மாதம் முதல் அந்தக் குழந்தைககு சத்துணவு மையங்களில் சத்துமாவு உருண்டை வழங்கப்பட்டது. இந்த சத்துமாவு உருண்டையை இளம் தாய்மார் தம் குழந்தைகளுடன் சத்துணவு மையத்துக்கு வந்து வாங்கி அங்கேயே ஊட்டிவிட வேண்டும். பின்பு சத்துணவு சமையலர்களின் சோம்பேறித் தனத்தால் சத்துமாவு பாக்கெட்டை இளம் தாய்மாரிடம் கொடுத்து வீட்டுக்குச் சென்று கொழுக்கட்டை செய்து அனைவரும் சாப்பிட்டுத் தீர்த்து விட்டனர்.

என் மகன் எம்.ஜி.ராமச்சந்திரன்

எம்.ஜி.ஆர்

திருப்பூரில் வாழ்ந்து இளம் வயதில் சுதந்திரப் போரில் உயிர் நீத்த கொடி காத்த குமரனின் வரலாற்றை நாம் படித்திருப்போம். இந்த கொடி காத்த குமரனின் மனைவி ராமாயி மிகவும் வறுமையில் உழல்வதாகத் தகவல் கிடைத்ததும் முதலமைச்சாரா இருந்த எம்ஜி.ஆர் அவரை நேரில் சந்தித்தார். நாட்டுக்காக உழைத்த நல்லவரின் மனைவி பிறரிடம் உதவி பெறுவதை விரும்பமாட்டார் என்பதை நன்குணர்ந்த எம்.ஜி.ஆர் ராமாயியை அவர் வீட்டில் சந்தித்து அம்மா நான் உங்கள் மகன் எம்.ஜி.ராமச்சந்திரன் வந்திருக்கிறேன். என் தாய்க்கு நான் உதவ விரும்புகிறேன் என்றார். ராமாயியின் மனம் நெகிழ்ந்தது. மகன் தரும் உதவியை எந்தத் தாயாவது மறுப்பாரா? ஏற்றுக்கொண்டார். இந்த உறவை ராமாயி அம்மாள் இறுதிவரை பெருமையாக ஏற்றுக்கொண்டார். என் மகன் எம்.ஜி. ராமச்சந்திரன் சென்னையில் இருக்கிறார் என்று அந்தத்தாய் அன்போடு குறிப்பிடுவோர். எம்.ஜி.ஆர் அந்த ராமாயி அம்மாவை, ‘அம்மா” என்று அழைத்தது செய்தி அல்ல. ராமாயி அம்மா அவரை தனது மகன் என்று அடுத்தடுத்த நிகழ்ச்சிகளில் குறிப்பிட்டதுதான் செய்தி.

ஒரு மகன் பட்டாளம், ஒரு மகன் சினிமா

மாட்டுக்கார வேலன் ஷூட்டிங் வைகை அணையில் நடந்தபோது சுற்று வட்டார கிராமங்களில் இருந்து கூட்டம் வந்து அங்கேயே இரவுபகலாக அமர்ந்துவிட்டது. பகலில் படப்பிடிப்பு இடைவேளையின்போது ஒரு மூதாட்டி எம்.ஜி.ஆரைப் பார்க்க வந்தார். எம்.ஜி.ஆர் அவரிடம் உங்களுக்கு எத்தனை பிள்ளைகள்? அவர்கள் என்ன செய்கிறார்கள்? என்று விசாரித்தார். அதற்கு அந்தத்தாய் எனக்கு இரு மகன்கள் ஒருவன் பட்டாளத்தில் இருக்கிறான். இன்னொருவன் சினிமாவில் நடிக்கிறான்” என்றார். சினிமாவா? யார் அவர்? எனக்குத் தெரியாமல் இருக்கிறது சொல்லுங்கள் என்று எம்.ஜி.ஆர் கேட்டார். அதற்கு அந்தத் தாய் “நீ தானப்பா என் ரெண்டாவது மகன்” என்றார். எம்.ஜி.ஆர் நெகிழ்ந்து போனார். தேர்தல், பிரசாரப் பயணத்தின்போது இவர்களின் இந்த அன்பைப் பார்த்துத்தான் அவர் பல தருணங்களில் “இந்த மக்களுக்கு நான் என்ன செய்யப் போகிறேன் என்று கண்ணீர் விட்டிருக்கிறார். முதல்வரானதும் அதிகாரிகளின் மறுப்புக்கு அஞ்சாமல் நிதியை திரட்டி சத்துணவுத் திட்டத்தை அறிமுகப்படுத்தி குழந்தைகள் மற்றும் முதியவரின் பசிப்பிணியைப் போக்கினார்.

வருமான வரி பாக்கியை செலுத்த முன்வந்த தாய்

எம்.ஜி.ஆரின் மெய்க்காப்பாளர் கே.பி. ராமகிருஷ்ணன் எம்.ஜி.ஆரைத் தனது தலைமகனாகத் நினைத்த ஒரு அன்புத்தாய் பற்றி கூறியிருப்பார். அவருக்குச் சொந்த மகன் இருந்தார். அ.தி.மு.க ஆரம்பித்த பிறகு தி.மு.க ஆட்சி எம்.ஜி.ஆரின் பெயரைக் கெடுக்க பல முயற்சிகளை எடுத்தது. அதில் ஒன்று அவர் வருமானவரி செலுத்தவில்லை என்ற புரளி. இதைக் கேட்ட இந்த முஸ்லிம் தாய் தன் மகனை அழைத்து ‘அப்பா, உன் அண்ணன் எம்.ஜி.ஆர் வரி கட்டாமல் இருக்கிறாராமே. ஆவர் தான் சம்பாதித்த பணத்தை எல்லாம் ஊருக்குத் தர்மம் செய்துவிட்டு இன்று இந்த சோதனையில் சிக்கிவிட்டார். நாம் நம் சொத்தை அவர் பெயருக்கு மாற்றிவிடுவோம். அவர் நம் சொத்தை வருமானவரியை கட்டி விடட்டும் என்றார். மகனையும் தீவிர எம்.ஜி.ஆர் விசுவாசியாகத்தானே அந்தத் தாய் வளர்த்திருப்பார். அப்படியிருக்கும்போது மகன் மறுப்பாரா சம்மதித்துவிட்டார். தங்கள் கருத்தை எம்.ஜி.ஆருக்கு கடிதம் எழுதித் தெரிவித்தார். எம்.ஜி.ஆர், அவர்களின் அன்புக்கு நன்றி தெரிவித்து பதில் எழுதினார். சொத்துகளை மாற்றவேண்டாம் என்றும் தெரிவித்துவிட்டார். நேரில் போய் பார்த்து அந்தத்தாயாரிடம் பேசவும் விரும்பினார்.

ஒரு நாள் அந்தத் தாய் மரணப்படுக்கையில் இருப்பதால் கடைசியாக ஒருமுறை தன் மகனைப் பார்க்க விரும்புவதாக எம்.ஜிஆருக்குக் கடிதம் வந்தது. இனியும் காலதாமதம் செய்யக்கூடாது என்று எம்.ஜி.ஆர் புறப்பட்டுச் சென்று அந்த அன்புத்தாயை நேரில் சந்தித்தார். மகனைப் பார்த்த மகிழ்ச்சியில் அந்தத்தாய் தன் வாழ்வை நிறைவுசெய்தார்.

நீராகாரம் கொடுத்த தாய்

எம்.ஜி.ஆர் கட்சி ஆரம்பித்த பின்பு கொடி ஏற்றுவதாக அவரை தொண்டர்கள் தமது பகுதியின் சந்து பொந்து எல்லாம் அழைத்துச் செல்வது உண்டு. அவரும் போகுமிடம் எல்லாம் சாதிபேதம் பார்க்காமல் சுளிக்காமல் சிரித்த முகத்துடன் இருப்பார். ஒருமுறை ஒரு குடிசை வாசலில் கொடியேற்றச் சென்றபோது அங்கிருந்த ஒரு மூதாட்டி “அய்யா இந்த வேகாத வெயிலில் இப்படி சுற்றுகிறாயே இந்தா இதை குடிச்சிட்டு போ” என்று ஒரு சொம்பு நிறைய நீராகாரம் (முதல் நாள் மிஞ்சிய சோற்றில் ஊற்றி வைக்கப்படும் நீர்) கொடுத்தார். எம்.ஜி.ஆர் அதை வாங்கி கடகடவென்று குடித்துவிட்டார்.

மொட்டையடித்து கருமாதி செய்தோர்

எம்.ஜி.ஆர்

காதல் காட்சியில் பெண்களை ஏமாற்றி தன் பிம்ப வலைக்குள் சிக்க வைத்திருக்கிறார் எம்.ஜி.ஆர் என்று பாண்டியன் என்பவர் ஒரு நூல் எழுதியிருந்தார். அது பொய் என்று நிரூபித்தவர்கள் எம்.ஜி.ஆர் இறந்த பிறகு அவருக்கு மகன் ஸ்தானத்தில் இருந்து மொட்டையடித்து கருமாதி செய்த பல்லாயிரம் ஆண்கள் ஆவர். எம்.ஜி.ஆரை விட சிவாஜி, ஜெமினி ஆகியோரின் காதல் காட்சிகளில் நடித்து பெரியளவில் ரசிகர்களைப் பெற்றிருந்தனர். எம்.ஜி.ஆரை பெண்கள் ரசித்தத்தற்கும் மதித்ததற்கும் அடிப்படை காரணம் அவர் ஒரு சிறந்த மனிதனுக்கு உரிய அனைத்து பண்புகளையும் பெற்றிருப்பதாக அவர்கள் நம்பியது மட்டுமே.

நடிகை பத்மினியுடன் எம்.ஜி.ஆர் ராணி சம்யுக்தாவில் நடித்தபோது பத்மினியை குதிரையில் வைத்து கடத்திச் செல்லவேண்டும். அப்போது பத்மினி நான்கு மாதம் கர்ப்பமாக இருந்தார். அவரை முதலில் குதிரையில் அமர்த்தினார்கள். அப்போது எம்.ஜி.ஆர் பார்த்துப்பா பத்திரமாக செய்யுங்க என்று எச்சரித்துக்கொண்டே இருந்ததாக (பத்மினி) ஒரு பேட்டியில் குறிப்பிட்டார். எம்.ஜி.ஆர் ஒரு சிறந்த மனிதர் என்றும் நற்சான்று அளித்து இருந்தார்.

தன் அன்பாலும் கருணையாலும் எம்.ஜி.ஆர் பெண்களின் உள்ளத்தைக் கவர்ந்திருந்ததால் அவரைத் தம் மகனாகப் பலரும் கருதினர். எனவேதான், எம்.ஜி.ஆர் இறந்ததும் நீயும் மொட்டை அடிச்சுடுப்பா என்று தன் மகனிடம் கூறியபோது அந்த மகன்கள் தாயின் சொல்லை தட்டாமல் எம்.ஜி.ஆருக்காக மொட்டையடித்து கருமாதி செய்தனர். இது எம்.ஜிஆருக்குத் தெரியாது. ஆனால், எம்.ஜி.ஆரின் தாயன்புக்கு இது ஒரு சான்றாகும்.

தாயும் பிள்ளையும்

ஐந்து வயதில் தன் தாயைப் பிரிந்து வயிற்றுப் பிழைப்புக்காக பாய்ஸ் கம்பெனியில் சேர்ந்துவிட்ட எம்.ஜி.ஆருக்கு தாய்மீதான ஏக்கம் மனதுக்குள் இருந்திருக்கும். வளர்ந்ததும் தான் தன் பிள்ளைகளைப் பிரியாமல் தன்னுடன் வைத்து அன்பாக வளர்க்க வேண்டும் என்ற எண்ணமும் உறுதியாகத் தோன்றியிருக்கும். ஆனால், அவருக்குப் பிள்ளை இல்லை. “என் அண்ணனுக்கு ஒன்பது பிள்ளைகளைக் கொடுத்த இறைவன் எனக்கு ஒரு பிள்ளை கொடுக்கவில்லையே என்று அருள்தாசிடம் சொல்லி ஒருநாள் வருத்தப்படுகிறார். அவருடைய மனைவி சதானந்தவதி இரண்டுமுறை கருவுற்றபோது கருக்குழாயில் கருதங்கி வளர்ந்ததால் அதை வளர்க்க முடியவில்லை. அவருக்கு பின்பு காசநோய் தாக்கியதும் அவர் குழந்தைபெறத் தடையாக அமைந்துவிட்டது.

எம்.ஜி.ஆருக்கு ஒரு குழந்தையை ஆண்டவன் கொடுத்திருந்தால் அவர் இறந்தபோது அந்த ஒரு மகன் இறுதிக் கடன்களை நிறைவேற்றி இருப்பார். ஆனால் ஒரு பிள்ளை கூட இல்லாததால் பல ஆயிரம் மகன்கள் அவருக்கு இறுதிக்கடன் செய்து கோயில்களில் மோட்ச தீபம் ஏற்றினர். எல்லோருக்கும் பிள்ளைகள் மட்டும்தான் கிடைக்கும். ஆனால், எம்.ஜிஆருக்கு தாய்மார்கள் கிடைத்ததால் பிள்ளைகளும் சேர்ந்து கிடைத்தார்கள். இது ஒரு அபூர்வு நிகழ்வு.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

MUST READ

Advertisement

எடிட்டர் சாய்ஸ்