Vikatan.com

www.vikatan.com would like to send you push notifications.

Notifications can be turned off anytime from browser settings.

“தயாரிப்பாளர்களே... 20 வருஷ பழைய படத்தை வச்சு இப்போ சம்பாதிக்கலாம்..!’’ - கந்துவட்டி... தமிழ் சினிமாவின் ஹீரோவா... வில்லனா? - உண்மை பேசும் தொடர் அத்தியாயம்-2

கந்துவட்டி

இந்தத் தொடரின் முந்தைய அத்தியாயத்தைப் படிக்க இங்கே க்ளிக் செய்யவும்.

ஒரு திரைப்படத்தின் வெற்றி என்பது என்ன? 

வசூல், நல்ல விமர்சனம், பரவலான கவனம், விருதுகள்... எனப் பல காரணங்களை அடுக்கலாம். ஆனால், தமிழ்சினிமாவின் அடிப்படை பணம்தான். அதனால்தான் படப்பிடிப்புக்கு தேவையான பணத்தை வட்டிக்கு வாங்குவது, படம் எடுத்து முடித்தாலும் அதை ரிலீஸ் செய்யப் பணம் இல்லாமல் இன்னொரு நபரை எதிர்பார்த்து கையைப் பிசைந்துகொண்டு நிற்பது, தியேட்டர் டிக்கெட்டுகள் மூலம் வரும் வசூல் காப்பாற்றுமா என நகம் கடித்தபடி திரிவதுமாய் இருக்கிறார்கள். தமிழ்சினிமாவின் பெரும்பாலான தயாரிப்பாளர்கள், இயக்குநர்களுக்குத் தெரிந்த வருமான வழிகள், தியேட்டர் வசூல், சேட்டிலைட் ரைட்ஸ், ஃபாரீன் ரைட்ஸ்... என மிகச் சிலதான்.

அதில், சேட்டிலைட்ஸ் ரைட்ஸ் உரிமையிலும் இப்போது உலை எரிந்துகொண்டிருக்கிறது. தமிழ்சினிமாவில் ரிலீஸ் ஆகாமல் கிடப்பில் இருக்கும் 500க்கும் அதிகமான படங்களின் எண்ணிக்கைக்குக் கொஞ்சமும் குறையாமல் இருக்கிறது, சேட்டிலைட்ஸ் ரைட்ஸ் விற்கப் படாத படங்களின் எண்ணிக்கை. தயாரிப்பாளர் சங்கத் தலைவர் விஷால், "இதற்கான வழிவகைகளை சங்கமே மேற்கொள்ளும்" என்கிறார். 'தேவர் மகன்' படத்தில் வரும் வசனம் மாதிரி, 'மெதுவா மெதுவான்னா எம்புட்டு மெதுவாய்யா' எனக் கமல் பேசும் வசனம்தான் நினைவுக்கு வருகிறது.

"கந்துவட்டிக்குப் பணம் வாங்கிப் படம் எடுப்பதும், அதை ரிலீஸ் செய்ய மேலும் கடனை நம்பியே இருப்பதும், போட்ட பணத்தை எப்படியாவது வசூலிக்க, மேலும் மேலும் கடன் வாங்கி அந்தப் படத்திற்கு பப்ளிசிட்டி கொடுக்கும் நிலைதான் இன்றைய தமிழ்சினிமாவின் நிலை" என்கிறார், ஒரு தயாரிப்பாளர். ஆனால், "இதெல்லாமே தயாரிப்பாளர்களின் அறியாமை. கந்துவட்டிக்குப் பணம் வாங்கி அல்ல, பணமே இல்லாமல் படம் எடுக்க முடியும்" என்பது, இசையமைப்பாளர் சாம்.டி ராஜ் சொல்லும் சீக்ரெட். "நெட்பிலிக்ஸ்" நிறுவனத்திற்கு தமிழ்சினிமா குறித்த ஆலோசனை சொல்லிக்கொண்டிருப்பவர். விரைவில் வெளிவரவிருக்கும் 'ஏமாலி' படத்திற்கு இசையமைத்திருக்கிறார். அவரிடம் பேசுவோம்.

சாம்.டி ராஜ்

"தியேட்டர் வசூல், சேட்டிலைட், ஃபாரீன் ரைட்ஸ். இதை மட்டுமே நம்பிக்கொண்டிருக்கிறார்கள் பெரும்பாலான தமிழ்சினிமா தயாரிப்பாளர்கள். ஆனால், ஒரு திரைப்படத்தை 60க்கும் அதிகமான வழிகளில்  விற்பனை செய்யமுடியும்" என்றவர், அதற்கான வழிகளையும் சொல்கிறார்.

"கடன் பிரச்னை, கந்துவட்டிப் பிரச்னைகளில் இருந்து விடுதலை செய்யவும், நம்பிக்கை கொடுக்கும் வழிகளைக் காட்டவும் தமிழ்சினிமா தயாரிப்பாளர் சங்கம் செய்யவேண்டியது, ஒன்றுதான். அது, யாரோ அனுபவித்துக்கொண்டிருக்கும் தயாரிப்பாளர்களின் பணத்தை தயாரிப்பாளர்களுக்கே கிடைக்க வழி செய்வது". 

எப்படி?

"அமேசான், நெட்ஃபிலிக்ஸ் மாதிரியான இணையதளங்களின் வருகைக்குப் பிறகு, பணம் இருந்தால்தான் படம் எடுக்க முடியும் என்ற நிலை மாறியிருக்கிறது. நல்ல திரைக்கதை, அதைப் படமாக்குவதற்கான பட்ஜெட்... இரண்டும் உங்களிடம் இருந்தால், மேற்சொன்னதுமாதிரி பல நிறுவனங்கள் பணம் கொடுக்கத் தயாராக இருக்கிறார்கள். நல்ல கதையும், ஆர்வமும் இருந்தால் போதும். யாரிடமும் கடன் வாங்கவேண்டிய அவசியம் இல்லை, தயாரிப்பாளர்களைத் தேடித்திரிய வேண்டிய கட்டாயம் இல்லை.

அமேசான், நெட்ஃபிலிக்ஸ், பிக்ஃபிலிக்ஸ், ஸ்புல், பாக்ஸ் டிவி, ஹாட் ஸ்டார், விங் மூவிஸ் எனப் பல பிளாட்பார்ம் படைப்பாளிகளுக்கு இருக்கு. தமிழ்சினிமா தயாரிப்பாளர்களிடம் ரைட்ஸ் கேட்பவர்கள், 'ஆல் அதர் டிஜிட்டல் மீடியா' ரைட்ஸையும் சேர்த்து வாங்கிக்கிற பெரும் ஏமாற்று வேலை இங்கே தொடர்ந்து நடந்துக்கிட்டு இருக்கு. ஏன்னா, 'இனி எல்லாம் டிஜிட்டல்'ங்கிற சூழலைப் புரிஞ்சுக்காத தயாரிப்பாளர்கள் சொற்ப தொகைக்கு அந்த ரைட்ஸை கொடுத்துடுறாங்க. இதைத் தயாரிப்பாளர்கள் முதல்ல உணரணும். ஏன்னா, குறும்படங்களையே அமேசான், நெட்ஃபிலிக்ஸ் மாதிரியான இணையதளங்களில் விற்கும் நிலை இப்போ வந்துடுச்சு.

சாம்.டி ராஜ்

அதுக்கான வழிமுறைகள் இங்கே இருக்கிற சில தயாரிப்பாளர்களுக்குத் தெரியும்னாலும், அதை மத்தவங்களுக்கும் சொல்லிக்கொடுக்கமாட்டேங்கிறாங்க. அந்த நிலையை மாத்தணும். 20 வருடங்களுங்களுக்கு முன்னாடி ரிலீஸ் ஆன ஒரு படத்தை இப்போ இணையதளத்துல ரிலீஸ் பண்ணி ஒவ்வொரு மாசமும் சில லட்சம் சம்பாதிக்கிற சிலரைப் நான் பார்த்திருக்கேன். இதை எல்லாத் தயாரிப்பாளர்களும் பின்பற்றலாம்" என்பவர், ஒரு படம் ஒட்டுமொத்த உலக மொழிகளிலும் பேசிக்கொண்டிருக்கும் ஆச்சரியத்தையும் சொல்கிறார்.

"இதுக்காகவே மும்பையில் சில ஏஜென்ஸிகள் இருக்காங்க. உங்க படத்தை குறிப்பிட்ட தொகைக்கு உங்ககிட்ட வாங்கிக்கிட்டு, உலகின் பல்வேறு மொழிகளுக்கும் "சப்-டைட்டில்" செய்து வெளியிடுறாங்க. நம்மகிட்ட 50,000க்கும் அதிகமான படங்கள் இருக்கு. என்ன பண்றோம்?

அதையெல்லாம், குவாலிட்டி மாத்தி, சப் டைட்டில் கொடுத்து, அப்டேட்டட் டிரெய்லர் ரெடி பண்ணி,  அதோட தரத்தை மேம்படுத்திக்கொடுத்தா, அதை வாங்கி ரிலீஸ் பண்ண நிறைய இணையதளங்கள் இருக்கு. இங்கே பிரச்னை சினிமாவுக்கான பிஸ்னஸ் பிளாட்பார்ம் என்னென்ன... என்ற புரிதல் இல்லாததுதான். லோ பட்ஜெட்ல எடுக்கப்படுற பல நல்ல படைப்புகள் தியேட்டர்களில் ரெண்டுநாள்கூட ஓடலைனு பொழம்புறோம். 'கர்மா'னு ஒரு லோ பட்ஜெட் படம் தியேட்டர்ல சரியான ரெஸ்பான்ஸைப் பெறலை. ஆனா, அமேசான் தளத்துல சக்கைப் போடு போட்டுக்கிட்டு இருக்கு. ஆக, இங்கே தவறு ரசிகர்கள் மேல இல்லை. தியேட்டர்ல படம் பார்க்கிற அளவுக்கு, ரசிகர்கள் இங்கேயும் படம் பார்த்துக்கிட்டு இருக்காங்க. இந்த உண்மையை தயாரிப்பாளர்கள், இயக்குநர்கள் புரிஞ்சுக்கிட்டா, இன்னொரு அசோக்குமாரை நாம இழக்கவேண்டிய அவசியம் இருக்காது. 'ஃபைனான்ஸியர்கள் இல்லாம படம் பண்ணமுடியாது'னு சொல்லவேண்டிய கட்டாயமும் இருக்காது" என்று முடிக்கிறார், சாம்.டி.ராஜ். 

"சன் நெக்ஸ்ட், ஏர்டெல் டிவி, ரிலையன்ஸ் எனப் பல நிறுவனங்கள் தமிழ்த் திரைப்படங்களுக்கான சந்தையைக் கச்சிதமாக உணர்ந்து செயல்பட்டுக்கொண்டிருக்கின்றன. நாம்தான் இன்னும் தியேட்டர்  மட்டுமே நம்பிக்கொண்டிருக்கிறோம்" என ஆதங்கப்படுகிறார்,  இளம் இயக்குநர் ஒருவர். 

இங்கே திருந்த வேண்டியது யார்? புரிதல் இல்லாமல் செயல்பட்டுக்கொண்டிருப்பவர்கள் யார்? தயாரிப்பாளர்கள் மட்டுமா?

''சினிமாவுக்கு வெளியே இருக்கும் மோசடிகளைவிட, சினிமாவுக்குள்ளேயே நடக்கும் மோசடிகள் கொடூரமானவை. ஒரு படைப்பாளி உணரும்விதமே நடக்கும் கொடூரம் அது. சினிமா தயாரிப்பாளர்கள் ஏன் கடன் வாங்குகிறார்கள், மன்னிக்கவும்... ஏன் கடனாளி ஆக்கப்படுகிறார்கள்?" என்ற உண்மையைச் சொல்கிறார், தயாரிப்பாளரும் இயக்குநருமான ஒருவர். அதை அடுத்தப் பகுதியில் பார்ப்போம்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

MUST READ

Advertisement

எடிட்டர் சாய்ஸ்

Advertisement