வெளியிடப்பட்ட நேரம்: 17:01 (29/01/2018)

கடைசி தொடர்பு:18:15 (29/01/2018)

''விஜய்சேதுபதிக்கு என் வலி புரியும். ஏன்னா..." - 'பத்மாவத்' படத்தின் டப்பிங் ஆர்ட்டிஸ்ட் ஆதித்யா

"சென்னைக்கு முதலில் வரும் போது ஹீரோவாகணும்னு ஆசை. சில படத்திலும்  நடித்தேன். ஆனால், எந்தப் படமும் பேர் சொல்லும் அளவுக்குப் பேசப்படவில்லை. அப்போதுதான் சினிமாவில் இருந்த சிலர், 'உன் வாய்ஸ் யுனிக்கா இருக்கு. நீ டப்பிங் ஆர்ட்டிஸ்ட் ஆக முயற்சி பண்ணு'னு சொன்னாங்க. அப்போது ஆரம்பித்ததுதான், டப்பிங். இன்னைக்கு நான் ஃபுல் டைம் பிஸியாக இருக்கிற அளவுக்குப் போயிட்டிருக்கு' எனப் பேசத் தொடங்குகிறார், ஆதித்யா. 'பத்மாவத்' படத்தில் ஷாகித் கபூருக்கு டப்பிங் பேசியவர்.  

பத்மாவத்

'உச்சகட்டம்' என்ற படத்துக்குத்தான் முதல் முதலில் டப்பிங் பண்னேன். அந்தப் படம் ரிலீஸாகவில்லை.  'சின்ன மருமகள்' சீரியல்தான், நான் டப்பிங் கொடுத்த முதல் சீரியல். அப்புறம் நிறைய சீரியலுக்கு டப்பிங் கொடுக்கிற வாய்ப்பு தேடி வந்தது. 'அனு பல்லவி', 'அழகி', 'தெய்வமகள்', 'தாமரை'னு நிறைய சீரியல்களுக்கு டப்பிங் கொடுத்திருக்கேன். சில படங்களில் ஹீரோக்களுக்கும்  டப்பிங் வாய்ஸ் கொடுக்கிற வாய்ப்பு கிடைச்சது. தெலுங்குப் படமொன்றை தமிழில் 'பதவி' என்ற பெயரில் டப்பிங் செய்தார்கள். 'ஆதி' படத்தில் வில்லனாக நடித்த சாய் குமார்தான், இந்தப் படத்துக்குத் தயாரிப்பாளர். படத்தில் இரண்டு ஹீரோக்கள் சர்வானந்த், சந்தீப். 

இந்தப் படத்தில் நடித்த சர்வானந்துக்கு டப்பிங் வாய்ஸ் கொடுக்க நான் போயிருந்தேன். ஏன்னா, இதுக்கு முன்னாடியே சர்வானந்துக்கு 'ராஜா மஹாராஜா' படத்துல நான் வாய்ஸ் கொடுத்திருந்தேன். அப்போது டப்பிங் ஸ்டுடியோவில் என் வாய்ஸைக் கேட்டவர்கள், 'உங்க வாய்ஸ் இந்தக் கேரக்டருக்கு செட் ஆகலை. நீங்க சந்தீப்புக்கு ட்ரை பண்ணுங்க'னு சொன்னாங்க. 

அப்புறம் பத்து நாள் கழிச்சு போன் பண்ணி, 'உடனே ஸ்டுடியோவுக்கு வா'னு கூப்பிட்டாங்க. உள்ளே போனா, சாய் குமார் சார் உட்கார்ந்து இருந்தார். என்னைப் பார்த்தவுடன் அப்படியே என் தோலை உலுக்கி, 'ஆதி, வாட் எ வாய்ஸ்'னு சொன்னார். அவர் என்னைப் பாராட்டியவுடன் மிரண்டுவிட்டேன். ஏன்னா, அவரே ஒரு பெரிய டப்பிங் ஆர்ட்டிஸ்ட். அப்போதுதான், எனக்குள்ளே டப்பிங் ஆர்ட்டிஸ்ட்டாக வரலாம்னு பெரிய நம்பிக்கை ஏற்பட்டுச்சு. 

தமிழ்ப் படங்களைப் பொறுத்தவரை  பெரிய ஹீரோக்கள் எல்லோரும் அவங்க சொந்தக் குரலிலேயே வாய்ஸ் கொடுத்துடுவாங்க. அதனால, என்னை மாதிரி டப்பிங் ஆர்டிஸ்ட்க்குப் பெரிய ஹீரோக்களுக்கு டப்பிங் வாய்ஸ் கொடுக்குற சான்ஸ் கிடைக்காது. பெண்களைப் பொறுத்தவரை, முக்கால்வாசி ஹீரோயின்ஸ் வேறு மாநிலத்திலிருந்து வருவதால் மெயின் ஹீரோயின்ஸ் எல்லோருக்கும் டப்பிங் ஆர்டிஸ்ட் வாய்ஸ் கொடுப்பாங்க. 

அதனால, சீரியலில் நடிக்கும் ஹீரோக்களுக்கு மட்டும் டப்பிங் வாய்ஸ் கொடுத்திருந்தேன். 'ராஜா ராணி' சீரியலில் ஹீரோ கார்த்திக் வாய்ஸும் நான்தான்.  இதை சொன்னால், என் ஃபிரெண்ட்ஸ்கூட நம்பமாட்டாங்க. 'டேய் மச்சான், பொய் சொல்லாத... எங்கே செண்பானு சொல்லுபார்ப்போம்'னு கலாய்ப்பாங்க. இப்படியே என் வாழ்க்கை ஓடிட்டு இருந்துச்சு. தீபிகானு ஒரு தோழி,  'உங்க வாய்ஸ் சூப்பரா இருக்கு. ஏன் இத்தனை நாளா உங்க வாய்ஸை யாரும் கண்டுக்கலை'னு  சொல்லி, எக்கச்சக்கமான டப்பிங் படங்களுக்கு என் வாய்ஸை பயன்படுத்த ஆரம்பிச்சாங்க.  

டப்பிங் ஆர்ஸ்டிஸ்ட்

ஜீ தமிழில் 'ஜேம்ஸ் பாண்ட் வெர்ஷன்'னு ஒரு சீரியஸ் வந்துச்சு. அதில் பாண்ட்க்கு நான்தான் டப்பிங் கொடுத்தேன். முப்பது படத்துக்கு மேல் பாண்ட்டுக்கு வாய்ஸ் கொடுத்தேன். அதற்கு அப்புறம் தியேட்டர் படங்கள் எல்லாத்துக்கும் டப்பிங் கொடுக்க ஆரம்பித்தேன். ''தி அவெஞ்சர்ஸ் படத்தில் வரும் 'ஹல்க்' கேரக்டருக்கு  என் வாய்ஸ் யூஸ் பண்ண ஆரம்பிச்சாங்க. அப்புறம் 'ஜுராஸிக் வேர்ல்டு' படத்தில் வர்ற ஹீரோவுக்கு, 'எக்ஸ் மேன்' படத்தில் வரும் வில்லன், 'The transformers last knight', 'The wolverine' , 'பே வாட்ச் ' எனப் பல படங்களுக்கு வாய்ஸ் கொடுத்தேன். நிறைய ஹாலிவுட் படங்களை தமிழில் டப் செய்தால் என் வாய்ஸைதான் யூஸ் பண்ணுவாங்க. 'தோனி' படத்தை தமிழில் டப் செய்தபோது அதிலும் முக்கியமான கேரக்டருக்கு வாய்ஸ் கொடுத்தேன். 

அப்போதுதான், 'பத்மாவத்' படத்துக்காக வாய்ஸ் டெஸ்ட் எடுத்தாங்க. என்னுடன் சேர்ந்து பத்து பேர் வாய்ஸ் கொடுத்திருப்போம். வாய்ஸ் கொடுக்கும்போது எங்க யாருக்கும் எந்தப் படத்துக்காக வாய்ஸ் டெஸ்ட் கொடுக்குறோம், யாருக்காக வாய்ஸ் கொடுக்குறோம்னு எதையும் சொல்லலை. இரண்டு நாள் கழித்து மும்பைக்கு டப்பிங் வாய்ஸ் கொடுக்க புறப்படச் சொன்னாங்க. நானும் கிளம்பினேன். ஸ்டுடியோ போனா, 'பத்மாவத் ' படம் ஓடிட்டு இருந்துச்சு. 'ஆதி டேக் போலாமானு கேட்டாங்க'. 'யாருக்கு'னு கேட்டேன். ஷாகித் கபூர் வாய்ஸூக்கு தமிழ் டப்பிங் கொடுக்கச் சொன்னாங்க. எனக்கு ஒரே ஆச்சர்யம். என் கேரியரிலும் ஒரு படி மேலே போக இந்தப் படம் முக்கியமான காரணமா இருக்கும்னு தோணுச்சு. ஏன்னா, அதுவரை சரித்திரப் படங்களுக்கு நான் வாய்ஸ் கொடுத்ததில்லை. 

ஒரே நாளில் படத்துக்கான டப்பிங் பேசி முடித்தேன். இரண்டாவது நாள் ஷாகித் கபூர் கத்துற சீனுக்கான வாய்ஸ் மட்டும் கொடுத்தேன். கம்பீரத்துடன் இந்தப் படத்தில் வசனம் பேசுற காட்சிகள் நிறைய இருந்தது. அதில் குறிப்பிட்ட சீனுக்கு வாய்ஸ் கொடுக்கும்போது ரொம்ப கஷ்டப்பட்டேன். தீபிகா படுகோனுடன் பேசும்போது காதல் உணர்வுடனும், அலாவுதீனுடன் பேசும்போது கோபமாகவும், தளபதிக்குக் கட்டளையிடும் போது அரசனாகவும் பேசணும். எல்லாத்துக்கும் வேற வேற மாடுலேஷன் காட்டினேன். தியேட்டரில் படத்தைப் பார்க்கும்போது, 'அட, நம்ம வாய்ஸா இது'னு எனக்கே ஆச்சர்யம். 

டப்பிங் ஆதித்யா

'பத்மாவத்' படத்தை தமிழில் பார்த்துவிட்டு படக்குழுவினர் போன் செய்து ரொம்பப் பாராட்டினாங்க. இன்னைக்கு எல்லோரும் என் வாய்ஸ் நல்லாயிருக்குனு பாராட்டுறாங்க. நான் ஒரு காலத்தில் டப்பிங் ஆர்டிஸ்ட்டாக வேலை பார்த்துக்கொண்டே, சென்னையில் இருந்த எல்லா எப்,எம். ஸ்டேஷனிலும் ஆர்.ஜே வேலைக்கு முயற்சி பண்ணியிருக்கேன். அப்போது, யாரும் எனக்கு வேலை கொடுக்கவில்லை. ஒரு முறை சூரியன் எப்.எம்-ல் இன்டர்வியூக்காகப் போயிருந்தேன். அப்போ, 'ரம்மி' பட புரோமோஷனுக்காக விஜய்சேதுபதி அங்கே வந்திருந்தார். என்னைப் பார்த்துவிட்டு, 'எதுக்கு வந்து இருக்கீங்க'னு கேட்டார். 'ஆர்.ஜே ஆக முயற்சி பண்றேன்'னு சொன்னேன். 'பாஸ், நீங்கள் எல்லாம் மைக் புடிச்சு, நைட் டைம் ஷோ பண்ணா, செம்மையா இருக்கும். வாய்ஸ் சூப்பரா இருக்கு'னு பாராட்டினார். இன்னைக்கு நான் இவ்வளவு பெரிய டப்பிங் ஆர்ட்டிஸ்ட்டா வளர்ந்திருக்கிறது தெரிஞ்சா, கண்டிப்பா அவர் சந்தோஷப்படுவார். ஏன்னா, விஜய்சேதுபதியும் சினிமாவில் கூட்டத்தில் ஒருத்தனா டப்பிங் வாய்ஸ் கொடுத்திருக்கிறார். அதனால், அவருக்கு என் வலி புரியும்'' என முடிக்கிறார், ஆதித்யா. 

நீங்க எப்படி பீல் பண்றீங்க


டிரெண்டிங் @ விகடன்