Vikatan.com

www.vikatan.com would like to send you push notifications.

Notifications can be turned off anytime from browser settings.

“தனுஷ், நயன்தாராவோட நடிக்கிற அளவுக்கு அறந்தாங்கி நிஷா வளர்ந்த கதை..!” - அத்தியாயம் 8

ரியாலிட்டி ஷோ

இந்தத் தொடரின் முந்தைய அத்தியாயத்தைப் படிக்க இங்கே க்ளிக் செய்யவும்.

“கலக்கப்போவது யாரு சீசன் 5-ன் போட்டியாளராகத்தான் நிஷாவை எனக்கு தெரியும். அந்த சீசனுக்காக ஆடிஷன் நடக்கும் போது நிஷாவால கலந்துக்க முடியலை. அப்பறம் என்னோட உதவி இயக்குநர் ஹரிதான் நிஷாவை எனக்கு அறிமுகம் செய்து வச்சான். நிஷாவோட ஸ்டாண்ட் அப் காமெடியைப் பார்த்தவுடனே அவங்களை செலக்ட் பண்ணிட்டேன். அந்த சீசனில் அன்னலட்சுமி, சசிகலானு இரண்டு பெண் போட்டியாளர்கள் இருந்தாலும், நிஷாதான் ஃபைனல் வரைக்கும் வந்து, ரன்னர் அப் ஆனாங்க. நிஷாவைப் பொறுத்தவரைக்கும் அவங்களை பாராட்டுனா, ‘என்ன கலாய்க்கிறீங்களா’னு கேட்பாங்க. கலாய்ச்சீகன்னா, தாங்க்யூவா டேங்க்யூனு அவங்க ஸ்டைல்ல சொல்லிட்டு போவாங்க. இதைத்தான் நிஷாவோட முதல் வெற்றியா நான் பார்க்கிறேன். தன்னை கலாய்ச்சாலும் அதெல்லாம் ஒரு மேட்டரா எடுத்துக்காம போயிட்டே இருப்பாங்க. ஆனால், எப்போ கலாய்க்கணும், எப்போ கலாய் வாங்கணும்னு நிஷாவுக்கு நல்லா தெரியும்.

ஒரு பெண் போட்டியாளரா நிஷா நிறைய விஷயத்தை ப்ரேக் பண்ணினாங்க. தன்னை தானே கலாய்ச்சி காமெடி பண்ணுவாங்க, நடுவரா இருந்த பாலாஜியை மாமானு கூப்பிடுவாங்க, தன்னோட கணவர், மாமியாரை திட்டி காமெடி பண்ணுவாங்க. இப்படி பல விஷயங்களை தைரியமா பண்ணுனாங்க. சீசன் 5க்கு முன்னாடி நிஷா பட்டிமன்ற பேச்சாளரா இருந்தாங்க. பொதுவா பட்டிமன்ற பேச்சாளராக இருக்கவங்க காமெடி பண்ண வந்தா, அங்கேயும் பட்டிமன்றத்துல பேசுற மாதிரியே பேசுவாங்க. ஆனால், நிஷா அப்படியில்லை. இங்க வந்தா பக்கா காமெடியனாகவும், அங்க போன சிறந்த பேச்சாளராகவும் இருப்பாங்க.

அறந்தாங்கி நிஷா

நிஷா கலந்துக்கிட்ட முதல் எபிசோடுலேயே அவங்களோட நிறத்தை வைத்து காமெடி பண்ணுனாங்க. அது அப்படியே தொடர்ந்து நடுவர்களும் நிஷாயோட நிறத்தை வச்சு காமெடி பண்ண ஆரம்பிச்சுட்டாங்க. அது நிஷாவுக்கோ, அவங்க வீட்டுக்கோ எந்த பிரச்னையும் இல்லை. ஆனால், வெளியில என்னைப் பார்க்கிற நிறைய பேர், ‘ஏன் அந்தப் பொண்னோட நிறத்தை வச்சு காமெடி பண்றீங்க. அந்தப் பொண்ணு ஒன்னும் சொல்லலைனா அப்படி பண்ணலாமா..? கறுப்பா இருக்கிற பெண்கள் அந்த காமெடியைப் பார்த்தால் சிரிப்பாங்கனு நினைக்கிறீங்களா?’னு பல கேள்விகள் கேட்டாங்க. அதுக்கப்பறம்தான் அந்த மாதிரியான உருவகேலி, நிறகேலியை முடிந்த அளவுக்கு குறைச்சிட்டு வரேன்.

அப்பறம் கணவரையும், மாமியாரையும் திட்டு நிறைய காமெடி சொல்லுவாங்க நிஷா. மாமியாரை ‘கிழவி’னு சொல்லுவாங்க, என் புருஷனை நேத்து மூக்குலையே ஒண்ணு விட்டேன்’னு சொல்லுவாங்க. இதெல்லாம் நடுவர்கள் கேட்டும் போது, ‘இப்படியெல்லாம் சொல்றீயே நிஷா, வீட்டுக்கு போனா உனக்கு சோறு கிடைக்குமா?’னு கேட்பாங்க. எனக்கும் இதே சந்தேகம் இருந்துச்சு. அதை நிஷாகிட்ட கேட்கும் போது, ‘இதெல்லாம் காமெடிக்குதான்னு என் வீட்டுல புரிஞ்சுக்கிட்டப் பின்னாடிதான் சார் நான் இந்த மாதிரி பேசவே ஆரம்பிச்சேன். அவங்க இதை சீரியஸா எடுத்துக்கிட்டா என்னால இப்படியெல்லாம் பேச முடியாது’னு சொன்னாங்க. உண்மையாகவே நிஷா வீட்டுல இப்படி ஒரு சப்போர்ட் இல்லைன்னா அவங்கனால இந்த மாதிரி காமெடி பண்ணவே முடியாது. அதேமாதிரி ஷூட்டிங்கிற்கு அறந்தாங்கியில இருந்து தனியா வந்து இரண்டு நாள் சென்னையில தங்கி ஷூட் முடிச்சிட்டு போவாங்க.

அறந்தாங்கி நிஷா

கலக்கப்போவது யாரு நிகழ்ச்சியில சீசன் 1ல இருந்து இப்போ நடந்துட்டுவர சீசன் 7 வரைக்கும் பாத்தீங்கன்னா, நிஷா மாதிரி ஒரு பெண் போட்டியாளர் எங்க நிகழ்ச்சிக்கு கிடைக்கவே இல்லை. அவங்ககிட்ட எனர்ஜி, ஹூமர் சென்ஸ், தொடர்ச்சியா திக்காம காமெடி பண்ற திறமைனு நிறைய விஷயங்கள் இருக்கு. மொத்தத்துல சுருக்கமா சொல்லணும்னா எங்க டீமோட ‘லேடி சூப்பர்ஸ்டார்’ நிஷாதான். அவங்களோட இந்த வளர்ச்சி, திறமையினாலதான் இப்போ தனுஷ் சாரோட ‘மாரி 2’ படத்துலையும், நயன்தாரா மேடமோட ‘கோலமாவு கோகிலா’ படத்துலையும் நடிக்கிறாங்க. தனுஷ் சாரைப் பார்க்க போயிருந்தபோது கிட்டத்தட்ட ஒரு மணி நேரம் படத்தைப் பற்றி டிஸ்கஷன் பண்ணுனாராம். அவங்களோட காமெடியை எல்லாம் சொல்லி, நிறைய பாராட்டினாராம். அதை ரொம்ப சந்தோஷமா என்கிட்ட வந்து சொன்னாங்க.

நிஷா எப்போதும் இது போதும்னு நிறுத்த மாட்டாங்க. எப்போ போன் பண்ணுனாலும் எக்மோர்ல இருக்கேன், கிண்டியில இருக்கேன்னு சொல்லிட்டே இருப்பாங்க. அதுக்கு நான், ‘என்ன நிஷா கால் டாக்ஸியிலையா வேலைப் பார்க்குறீங்க. எப்போ போன் பண்ணுனாலும் ஒவ்வொரு இடம் சொல்றீங்க’ன்னு கேட்பேன். அந்த அளவுக்கு ஓடிட்டே இருப்பாங்க. பழனியும் நிஷாவும் கலக்கப்போவது யாருல எப்படி ஒத்துமையா காமெடி பண்றாங்களோ, அதே மாதிரிதான் ஈவென்ட்லையும் பண்ணுவாங்க. நிஷாவுக்கு பழனியும் நல்ல சப்போட்டா இருக்கார். நிஷாவோட திறமைக்கு இன்னும் பல உயரங்கள் தொடுவாங்கனு நம்பிக்கை இருக்கு.”

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

MUST READ

Advertisement

எடிட்டர் சாய்ஸ்