Published:Updated:

``புத்தர் சொன்ன அழகான விஷயமும் மேக்கப் இல்லாத முகங்களும்!" - `டூ-லெட்' அனுபவம் சொல்லும் செழியன்

பிர்தோஸ் . அ

'டூ-லெட்' படம் மூலம் இயக்குநராக அறிமுகம் ஆகியிருக்கிறார், ஒளிப்பதிவாளர் செழியன். முதல் படமே தேசிய விருது பெற்றிருக்கிறது. படம் குறித்தும், படம் உருவான விதம் குறித்தும் பேசியிருக்கிறார், செழியன்.

``புத்தர் சொன்ன அழகான விஷயமும் மேக்கப் இல்லாத முகங்களும்!" - `டூ-லெட்' அனுபவம் சொல்லும் செழியன்
``புத்தர் சொன்ன அழகான விஷயமும் மேக்கப் இல்லாத முகங்களும்!" - `டூ-லெட்' அனுபவம் சொல்லும் செழியன்

65-வது தேசிய விருதுகளை மத்திய அரசு அறிவித்துள்ளது. இதில் சிறந்த தமிழ் படத்துக்கான விருதை  'டூ-லெட்' வென்றுள்ளது. இதை ஒளிப்பதிவாளர் செழியன் இயக்கியிருக்கிறார். 'ஜோக்கர்', 'பரதேசி', 'தாரை தப்பட்டை' படங்களுக்கு ஒளிப்பதிவாளராகப் பணிபுரிந்த இவர் இயக்கியிருக்கும் முதல் படம் இது. செழியனிடம் பேசினோம். ''தொடர்ந்து வாழ்த்துகள் வந்துக்கிட்டே இருக்கு, ஒரு இயக்குநரா ரொம்ப சந்தோஷமா இருக்கு!" எனப் பேசத் தொடங்குகிறார், செழியன்.

"தேசிய விருது அறிவித்த தருணம் சந்தோஷமா இருந்தது. ஏன்னா, இத்தனை படங்களுக்கு மத்தியிலே என் படம் கவனிக்கப்பட்டிருக்கு. நிறைய சிரமங்களுக்கிடையில்தான் இந்தப் படத்தைத் தயாரிச்சோம். நண்பர்கள் எல்லோரும் ஒன்றாகச் சேர்ந்து எடுத்த படம் இது. ஒரு தயாரிப்பில் இருக்கிற எல்லாக் கஷ்டங்களையும் தாங்கிக்கிட்டுதான், இந்தப் படத்தை முடிச்சோம். விருதுகளுக்கு அனுப்புற படத்தைத் தரமா எடுக்கணும். இந்தப் படத்தை உருவாக்கும்போது மனசுக்குள்ள ஓடிக்கிட்டே இருந்த விஷயம் இதுதான். 

ஏற்கெனவே நிறைய ஃபிலிம் பெஸிட்டிவல்களில் இந்தப் படம் விருது வாங்கியிருக்கு. சிறந்த படம், சிறந்த இயக்குநர், சிறந்த சவுண்ட்... கிட்டத்தட்ட எல்லா விருதும் வாங்கியிருக்கு. இத்தனை விருதுகள் வாங்கியிருந்தாலும், இந்தியாவில் தேசிய விருது வாங்கியிருப்பது இன்னும் சந்தோஷம். டி.வியில தேசிய விருது அறிவிச்ச சமயத்தில் நண்பர் ஒருவர்,  'டி.வியைப் பாருங்க'னு போன் பண்ணி சொன்னார், ஒவ்வொரு விருதுகளா அறிவிச்சுக்கிட்டு இருந்தாங்க. தமிழ்ப் படம் குறித்து எதுவும் இல்லை. 

அப்போ, ஒரு நிருபர் 'தமிழ் படத்துக்கு விருது சொல்லலை'னு பேசிக்கிட்டு இருந்தார். உடனே, சிறந்த தமிழ்ப் படம் 'டூ லெட்'னு சொன்னாங்க. கேட்டதும், அவ்ளோ சந்தோஷம். இந்தப் படத்தை தேசிய விருதுக்காக அனுப்பியிருந்தேன். நம்ம படம் தரமானதா இருந்தா, விருதுக்கு முன்னிலை பெறும்னு நம்பிக்கை இருந்தது. தவிர, நிறைய தகுதியான விருதுகளை என் படம் ஜெயிச்சிருந்ததுனால, நம்பிக்கை கொஞ்சம் அதிகமாவே இருந்தது. தேசிய விருது எப்போ அறிவிப்பாங்கனு தெரிஞ்சா, அதை எதிர்பார்த்துக் காத்திருக்கலாம். எப்போ அறிவிப்பாங்கனு தெரியலை. அதனால, ரொம்ப எதிர்பார்க்கலை. தேசிய விருதுகளை ஒவ்வொன்னா சொல்லிக்கிட்டு இருக்கும்போது, எனக்கு த்ரில்லர் படம் பார்த்த ஃபீலிங். 'டூ-லெட்' படத்துக்கு தேசிய விருது கிடைச்ச சந்தோஷத்தை எப்படி வெளிப்படுத்துறதுனு தெரியலை. 

இந்தப் படத்துக்கான கருவை சாதாரண மக்களோட வாழ்க்கையில இருந்துதான் எடுத்தேன். என் வாழ்க்கை, என் நண்பர்கள் வாழ்க்கைனு எல்லாமே இந்தப் படத்துல இருக்கு. 'உங்க வாழ்க்கைக்கு நீங்களே பெரிய சாட்சி'ங்கிற அழகான விஷயத்தை புத்தர் சொல்லியிருக்கார். நம்ம வாழ்க்கையிலே நாமளே பெரிய சூழ்நிலையில மாட்டிக்கிட்டு இருக்கும்போது, நாமளே அதுக்குக் காட்சியா இருப்போம்னு தோணுச்சு. அதனாலதான் வாழ்க்கையில நடந்த சம்பவங்களையே படமாக்கிட்டேன்.  

இந்தப் படத்தை 2016 டிசம்பர்ல எடுக்க ஆரம்பிச்சேன். டீமானிடைஷேசன் அறிவிப்பு வந்திருந்த சமயம். அதனால, ரொம்ப சிரமப்பட்டேன். படத்துல ஒரு சின்னப் பையன் நடிச்சிருக்கான். அவனை வெச்சு நாள் முழுக்க ஷூட் பண்றது கொஞ்சம் கஷ்டமா இருந்தது. ஏன்னா, அவன் ரொம்ப சோர்வு அடைஞ்சிருவான். சென்னையிலதான் படத்துக்கான ஷூட்டிங் நடந்தது. படத்துக்காக எந்த செட்டும் போடலை. எல்லாமே லைவ் லொக்கேஷன்ல எடுத்ததுதான். முப்பது நாளில் முழுப் படத்தையும் எடுத்து முடிச்சுட்டோம். படத்துல நடிச்ச யாரும் மேக்கப்கூட போடலை. இந்தப் படத்தை தயாரிக்கச் சொல்லி  சில தயாரிப்பாளர்களை அணுகினேன். ஆனா, எல்லோருமே படத்துல சில பாடல் காட்சிகளை வைக்கச் சொன்னாங்க. ஹீரோயினா நடிக்க, பெரிய நடிகை யாரையாவது ஒப்பந்தம் பண்ணுங்கனு சொன்னாங்க. எனக்கு அதில் உடன்பாடில்லை. ஏன்னா, இது எதார்த்தமான படம். படத்துல பாடல் மட்டுமில்ல, இசையே கிடையாது. இப்படி ஒரு முயற்சியை எடுக்க யாரும் முன்வராதப்போதான், என் மனைவியே இந்தப் படத்தை நாமே தயாரிக்கலாம்னு சொன்னாங்க. அவங்க கொடுத்த ஊக்கத்தில் தயாரிக்க ஆரம்பிச்சேன். இந்தப் படத்தோட தயாரிப்பாளர் என் மனைவிதான். இந்தப் படம் நிறைய விருதுகள் வாங்கினது அவங்களுக்கும் சந்தோஷம். முக்கியமா, தேசிய விருது வாங்குனது ரொம்பவே சந்தோஷம்!'' என்று முடிக்கிறார், செழியன்.

வாழ்த்துக்கள் செழியன்!

பிர்தோஸ் . அ

Make others happy by being happy ! “ Its my favorite quote. And I live towards it. I want to talk talk talk even if..