`` `பண்ணையாரும் பத்மினியும்' ஓர் உறவு, ஓர் ஏக்கம், ஒரு கொண்டாட்டம்!" - #5YearsOfPannaiyarumPadminiyum | Special article about Pannaiyarum Padminiyum movie

வெளியிடப்பட்ட நேரம்: 20:25 (07/02/2019)

கடைசி தொடர்பு:20:25 (07/02/2019)

`` `பண்ணையாரும் பத்மினியும்' ஓர் உறவு, ஓர் ஏக்கம், ஒரு கொண்டாட்டம்!" - #5YearsOfPannaiyarumPadminiyum

``பொருள்கள் உயிரற்றவை. ஆனால், அது வாழ்ந்துகொண்டிருக்கிறது. அப்படிப்பட்ட பொருள்களுடனான மனித உறவின் காரணத்தை அறிய முயற்சி செய்வது கடினம். ஆனால், அதை வெளிப்படுத்தலாம்; காட்சிப்படுத்தலாம் என்பதற்கு ஆகச்சிறந்த உதாரணம், `பண்ணையாரும் பத்மினியும்' திரைப்படம்."

`` `பண்ணையாரும் பத்மினியும்' ஓர் உறவு, ஓர் ஏக்கம், ஒரு கொண்டாட்டம்!

மனிதனின் ரசனைக்கு எல்லை இல்லை. ஒரு விஷயத்தின் மீதான மனிதனின் ஈர்ப்பை வரையறுக்க முடியாது. சக மனிதன் அல்லது பிற உயிர்களிடத்தில் காட்டும் கனிவை, அதன் மீது காட்டும் அடிப்படை அறமாக எடுத்துக்கொள்ளலாம். ஆனால், உயிரற்ற பொருள்களின் மீது வைத்துள்ள அளப்பறியா அன்பு, மனித உணர்வின் அழகியல். அது எதுவாக வேண்டுமானாலும் இருக்கலாம், அவரவர் சித்தம். பொருள்கள் யாதுமற்றவை. ஆனால், அது அதிசயமாகப் பார்க்கப்படுகிறது. பொருள்கள் அர்த்தமற்றவை. ஆனால், சிலரின் வாழ்விற்கு அர்த்தங்களைக் கொடுக்கிறது. பொருள்கள் உயிரற்றவை. ஆனால், அது வாழ்ந்துகொண்டிருக்கிறது. அப்படிப்பட்ட பொருள்களுடனான மனித உறவின் காரணத்தை அறிய முயற்சி செய்வது கடினம். ஆனால், அதை வெளிப்படுத்தலாம்; காட்சிப்படுத்தலாம் என்பதற்கு ஆகச்சிறந்த உதாரணம், `பண்ணையாரும் பத்மினியும்' திரைப்படம். 

பண்ணையாருக்கு (ஜெயபிரகாஷ்) ஏனோ பார்த்தவுடன் நண்பரின் காரின் மீது மிகப்பெரிய ஈர்ப்பு. அப்படிப்பட்ட காரை பண்ணையாருக்கு வழங்குகிறார், நண்பர். அதன் டிரைவர் ஆகிறான், முருகேசன் (விஜய் சேதுபதி). போக்குவரத்து வாகனங்கள் கிராமங்களுக்கு அறிமுகமான ஆரம்பச் சூழல்கள், ரசனையான காட்சிகளாக அமைக்கப்பட்டிருக்கும். `காரை நீ ஓட்டினால்தான் அதில் ஏறுவேன்' என்று கணவனை அன்பாகச் சீண்டும் மனைவி செல்லம்மா (துளசி). காரை ஓட்டியே தீருவேன் என வெள்ளந்தியான பண்ணையார்... எனப் பயணப்படும் கதை. 

பண்ணையாரும் பத்மினியும்

தமிழ் சினிமா, இளைஞர்களின் காதல் என்ற தளத்திற்குள் தன்னைப் பெருவாரியாகச் சுருக்கிக்கொண்டதோ என்று வருத்தப்படலாம். அந்தளவிற்கு ஒரு காரை சுற்றிய அற்புதமான கதைக்களத்தைக் கொண்டிருந்தது, `பண்ணையாரும் பத்மினியும்’. அதனுடாக, ஹீரோயிசம் என்ற குறிப்பிட்ட வெளியைத் தவிர்த்து, இரு முதிய கணவன் - மனைவி காதலின் அம்சங்களை ரசிக்க வைத்திருப்பார்கள். குறிப்பாக, `உனக்காகப் பொறந்தேனே எனதழகா' பாடல் காட்சிகளைச் சொல்லலாம். ஒவ்வொரு முறையும் இருவரும் தமக்குள்ளே பகிர்ந்துகொள்ளும் காதல், பேரன்பின் வெளிப்பாடு. `இந்த மொசரகட்டையப் பாக்காட்டி எனக்குச் சோறு இறங்காது' என்று அதன் நீட்சியாக முருகேசனைச் சொல்வார், பண்ணையாரின் மனைவி செல்லம்மா. தங்கள் வீடுதான் துக்கம் முதல் விசேஷம் வரை ஊர் மக்களின் அனைத்திற்கும் நிகழ்விடமாக இருக்கும். அதில், சிறுவர்கள் தாராளமாக விளையாடலாம். இப்படிப் பறந்து விரிந்துகிடக்கும் நேசங்கள் அனைத்தும் ஒரு காரணியால் தன் இருப்பியலை ஏக்கமாக வெளிப்படுத்தியிருப்பார்கள். அதுதான், பத்மினி கார். 

கார் கொடுத்த நண்பருக்கு உடம்பு சரியில்லை என்று தெரிந்தவுடன் `ஹை...' என்று கொண்டாடுவதும், காருக்குச் சிறு கோளாறு ஏற்பட்டாலும் துடிதுடித்துப் போவதுமாக காரிடம் சரணடைந்திருப்பார், பண்ணையார். `சின்னக்கொழந்த மாதிரி அடம்பிடிக்கிறார்டா' என்று முருகேசனிடம் செல்லம்மா சொல்லும்போழுது, காரை மகள் எடுத்துச் செல்லும்போது கலங்குவது எனத் தன் கணவன் மீதான அன்பிற்குக் காரை சாட்சியமாகப் பார்த்திருப்பார், செல்லம்மா. `அது எப்படி நம்ம காரை கொடுப்பது' என்பது, காருக்காக சாமிக்குப் போட்ட மாலையைக் கழற்றுவது என்று பத்மினியை தனது உடைமையாக நினைத்தான், முருகேசன். சுக துக்கங்களை இந்த காரில் அனுபவித்த ஊர் மக்கள், தெரிந்தால் சங்கடப்படுவார்கள் என்று கோளாறான விஷயத்தை மறைப்பதும், முன் சீட்டை அடைய வேண்டும் என்று இறுதிவரை தொடரும் ஒரு சிறுவனின் ஏக்கமுமாக ஒவ்வொன்றும் நெகிழ்வான காட்சியமைப்புகள். 

ஜெயபிரகாஷ், துளசி

9 நிமிடக் குறும்படத்தினை நேர்த்தியாகத் திரைப்படமாக்கியிருப்பார், படத்தின் இயக்குநர் அருண் குமார். `பார்க்க பொடியனாட்டம் இருக்கும் இந்தப் பையனா எடுத்தது' என்று பலரும் ஆச்சர்யப்பட்டுள்ளனர். வில்லன் பாத்திரம் இல்லாமல், புகை, மது, போதை போன்ற சமாசாரங்களைத் தவிர்த்து தனித்துவமாக திரைக்கதை அமைத்திருப்பார். தன் மெயில் ஐடியில் ஞாபகார்த்தமாக பழைய கார் நம்பரை வைத்திருக்கும் ஜெயபிரகாஷுக்கு பண்ணையார் பாத்திரம். தன் படங்களிலேயே முதன்மைப் பாத்திரமாக அமைந்த இப்படம், அவரின் மாஸ்டர் பீஸாக இருக்கும். தனக்கு முக்கியத்துவம் இருக்கிறதா என்றெல்லாம் பாராமல், அந்தக் கலையின் வடிவத்திற்குத் துணையாக நண்பன் படத்தை முழுமைப்படுத்திக் கொடுத்திருந்தார், விஜய் சேதுபதி. 

இவர்களுடன் பச்சை வண்ண பியட் பத்மினி. திரையிலும், திரையைப் பார்க்கும் பார்வையாளனுக்கும் இந்த கார் ஒரே மனநிலையைத்தான் கொடுத்தது. பத்மினி ஓர் உறவு. பத்மினி ஓர் ஏக்கம். பத்மினி ஒரு கொண்டாட்டம். ஐந்து வருடங்களுக்குப் பிறகு, `பண்ணையாரும் பத்மினியும்' குழுவிற்கு ஒரு வாழ்த்து! 


டிரெண்டிங் @ விகடன்