ரஜினி பட தயாரிப்பாளரிடம் கமல் வைத்த கோரிக்கை

கோவையைச் சேர்ந்த சந்திரகுமார் எழுதிய லாக்கப் என்கிற நாவலைத் தழுவி வெற்றிமாறன் எழுதி இயக்கியுள்ள விசாரணை பிப்ரவரி 5 ஆம் தேதி வெளியாகவிருக்கிறது.

தனுஷ் மற்றும் வெற்றிமாறன் இணைந்து தயாரித்திருக்கும் இந்தப்படத்தை ரஜினியின் எந்திரன் 2ஓ உள்ளிட்ட சில படங்களைத் தயாரித்துக்கொண்டிருக்கும் லைகா புரொடக்ஷன்ஸ் நிறுவனம் வெளியிடவிருக்கிறது. இந்தப்படத்தை கமல் பார்த்துவிட்டுப் பாராட்டியிருக்கிறார். அவர் தன்னுடைய டிவிட்டர் பக்கத்தில், நல்ல சினிமாவின் தாக்கத்தை வெற்றிமாறனின் மனதில் பதித்துச் சென்ற பாலுமகேந்திராவுக்கு நன்றி.

நேற்று விசாரணை படம் பார்த்து வியந்தேன் என்று சொல்லியிருக்கிறார். அவர் படம் பார்க்கும்போது உடனிருந்த லைபாபுரொடக்ஷன்ஸ் நிர்வாகி ராஜூமகாலிங்கத்திடம் இது பற்றிக்கேட்டபோது, படம் அவருக்கு மிகவும் பிடித்திருந்தது. இயக்குநர் வெற்றிமாறனிடம் படம் பற்றிய தன்னுடைய கருத்துகளைப் பகிர்ந்துகொண்டார்.

நீங்கள் பல பெரிய படங்களைத் தயாரித்தாலும் இதுபோன்ற நல்லபடங்களுக்குத் தொடர்ந்து ஆதரவு கொடுக்கவேண்டும் என்று எங்களிடம் கேட்டுக்கொண்டார். நல்லபடங்களின் மீது அவர் காட்டும் அக்கறை அதில் தெரிந்தது என்கிறார் ராஜூமகாலிங்கம்.   
 

 

Do you like the story?

Please Appreciate the Author by clapping!