கலைஞர்களுக்கான விருதா... கட்சிக்காரர்களுக்கான விருதா? தமிழ்நாடு திரைப்பட விருது சர்ச்சை #TNFilmAwards

தூங்கிக்கொண்டிருப்பவர்களை எழுப்பி 'குட் நைட்' சொன்னால் எப்படி இருக்கும்? நீண்ண்ண்ண்ட... இடைவெளிக்குப் பிறகு தமிழக அரசு அறிவித்திருக்கும் திரைப்பட விருதுகளுக்கான அறிவிப்பு அப்படித்தான் இருக்கிறது. பல ஆண்டுகளாக வழங்கப்படாமல் இருந்த தமிழக அரசின் திரைப்பட விருதுகள் ஒரேயடியாக  அறிவிக்கப்பட்டிருக்கின்றன. இதுவும் 2009 முதல் 2014 வரையிலான திரைப்பட விருதுகள்தான். இத்தனை வருட இழுத்தடிப்புக்குப் பிறகு அறிவிக்கப்படும் விருதுகள் எவ்வளவு தீவிரமாக ஆலோசித்து தேர்ந்தெடுக்கப்பட்டிருக்கவேண்டும்? ஆனால், விருதுகளுக்குத் தேர்வாகியுள்ள பல படங்களையும், கலைஞர்களையும் பார்த்தால் 'ஒரு ஊத்தப்பம் பார்சல்' என்ற ரேஞ்சில்தான் இருக்கிறது. 

'மலையன்' மலைப்பு!

'மலையன்' என்ற சுமாரான திரைப்படத்தின் மீது தேர்வுக் குழுவுக்கு அப்படியென்ன ஆர்வமோ தெரியவில்லை. 'மலையன்' படத்திற்கான சிறந்த நடிகருக்கான விருதை கரண், காமெடி நடிகருக்கான விருதை 'கஞ்சா' கருப்பு மற்றும் சிறந்த குணச்சித்திர நடிகருக்கான விருதை சரத்பாபு ஆகியோர் பெற்றிருக்கிறார்கள். 'மலையன்' வெளியான அதே 2009-ல்தான் 'நான் கடவுள்', 'உன்னைப்போல் ஒருவன்', 'வெண்ணிலா கபடிக்குழு', 'பேராண்மை' போன்ற கவனம் பெற்ற படங்கள் வெளியாயின.

தமிழ்நாடு திரைப்பட விருதுகள் 2017

ஒய்.ஜி.மகேந்திரனின் 'புத்ரன்' தெரியுமா? 

சிறப்புப் பரிசுக்கான பட்டியலில் 'புத்ரன்' என்ற படத்திற்கு மூன்று விருதுகள் இருந்தன. 2010-ஆம் ஆண்டின் சிறந்த படத்திற்கான மூன்றாவது இடம், ஒய்.ஜி.மகேந்திரனுக்கு சிறந்த நடிகருக்கான சிறப்பு விருது, நடிகை சங்கீதாவுக்கு சிறந்த நடிகைக்கான சிறப்பு விருது வழங்கப்பட்டிருக்கிறது. இப்படி ஒரு படம் வந்ததா எனக் கூகுளில் தேடவேண்டாம். யூ-டியூப், ஆன்லைன் என எங்குமே சில நொடி டீஸர் கூட இல்லாத, 2010-ஆம் ஆண்டில் வெளியான படங்களின் பட்டியலில் இல்லாத, திரையரங்குகளில் கூட வெளியாகாத 'புத்ரன்' என்ற இப்படத்திற்கு எந்தவகையில் விருது வழங்கப்பட்டது என்பதைப் படம் பார்த்தவர்கள்தான் (பார்த்திருந்தால்) தெளிவுபடுத்தவேண்டும். 

'மெரினா' குழப்பம்!

2011-ஆம் ஆண்டிற்கான சிறந்த படத்திற்கான சிறப்புப் பரிசு, இப்படத்தின்மூலம் சினிமாவில் அடியெடுத்து வைத்த நடிகர் சிவகார்த்திகேயனுக்கு சிறந்த நடிகருக்கான 'சிறப்புப் பரிசு' என இரு சிறப்பு விருதுகளைப் பெற்றிருக்கிறது, பாண்டிராஜ் இயக்கிய 'மெரினா' திரைப்படம். அதனால் என்ன? என்கிறீர்களா... இப்படம் வெளியான ஆண்டு 2011 அல்ல, 2012. ஒருவேளை 2011-ல் தணிக்கை செய்யப்பட்டிருக்கலாம் என சமாளித்தாலும், காலதாமதமாக வழக்கப்படும் இந்த விருதுகளில் 2012-ஆம் ஆண்டிற்கான பட்டியலில்தானே இப்படம் இடம்பிடித்திருக்கவேண்டும். அல்லது 'தணிக்கை செய்யப்பட்ட ஆண்டுதான், வெளியான ஆண்டாக அரசு கணக்கில் எடுத்துக்கொள்ளும்' எனத் தெளிவுபடுத்தவேண்டும்.

அ.தி.மு.க அரசியல்! 

நடித்தார்களோ இல்லையோ, நடித்த படம் நல்லபடமோ சுமாரான படமோ... விருது பெற்றவர்கள் பட்டியலில் அ.தி.மு.க அபிமானிகள் மற்றும் உறுப்பினர்களின் பெயர்கள் மறக்காமல் இடம்பெற்றிருக்கின்றன. அ.தி.மு.க உறுப்பினர் 'கஞ்சா' கருப்புவுக்கு 2009-ஆம் ஆண்டிற்கான சிறந்த காமெடி நடிகர் விருதும், 2011-ஆம் ஆண்டிற்கான சிறந்த காமெடி நடிகராக 'பல படங்கள்' எனப் பொதுவாகக் குறிப்பிடப்பட்டு, அதிமுக பேச்சாளரும் நடிகர், இயக்குநருமான மனோபாலாவுக்கு வழங்கியிருக்கிறார்கள். 2012-ஆம் ஆண்டிற்கான சிறந்த காமெடி நடிகைக்கான விருது அ.தி.மு.க-வைச் சேர்ந்த ஆர்த்திக்கு வழங்கப்பட்டிருக்கிறது, அந்தப் படத்தின் பெயர் 'பாரசீக மன்னன்'. 2014-ஆம் ஆண்டிற்கான காமெடி நடிகர் விருது 'பல படங்கள்' எனக் குறிப்பிடப்பட்டு அதிமுக உறுப்பினரும், நடிகருமான சிங்கமுத்துவுக்குக் கிடைத்திருக்கிறது. இதில், 'பல படங்கள்' என்ற குறிப்பு, அதிக படங்களில் நடித்திருக்கிறார்கள் என்பதால் விருதா, அனைத்துப் படங்களிலும் சிறப்பான காமெடி செய்தார்கள் என்ற கணக்கில் வழங்கப்பட்ட விருதா? என்பது தேர்வாளர்களுக்கு மட்டுமே தெரிந்த ரகசியம். 2011-ஆம் ஆண்டிற்கான சிறந்த பாடலாசிரியர் விருதைப் பெற்றிருக்கிறார், கவிஞர்.முத்துலிங்கம். விருதுபெற்ற படம், ராமராஜன் நடித்து வெளியான 'மேதை'.

தமிழ்நாடு திரைப்பட விருதுகள் 2017

தவிர, 'அயன்' படத்திற்குக் கொடுத்த விருதுகளைத் தவிர, 'சன் பிக்சர்ஸ்', 'தயாநிதி அழகிரி', 'உதயநிதி ஸ்டாலின்' லேபிள்களில் வெளியான படங்கள் எதுவும் விருதுகளுக்கான பட்டியலில் தப்பித்தவறி கூட இடம்பெறவில்லை. அரசியல் நோக்கம் என்றாலும், இவர்களது தயாரிப்பு மற்றும் வெளியீட்டில் உருவாகி, தேசிய விருது பெற்ற 'ஆடுகளம்', 'அழகர்சாமியின் குதிரை' போன்ற படங்களையும் கண்டுகொள்ளவில்லை. 'தென்மேற்குப் பருவக்காற்று' படத்திற்காக சிறந்த பாடலாசிரியருக்கான தேசிய விருது பெற்ற கவிஞர் வைரமுத்துவுக்கும் தமிழக அரசின் விருது இல்லை. 

எதிர்வினைகள் 

இப்படி ஒருதலைபட்சமாக, அரசியல் நோக்கத்தோடு, சரியான ஆய்வும் தேர்வும் இல்லாமல் அறிவிக்கப்பட்டிருக்கும் திரைப்பட விருதுகள் மீதான விமர்சனங்கள் வரத் தொடங்கிவிட்டன. ''சிறந்த சண்டைப் பயிற்சிக்கான விருது 'வந்தே மாதரம்' என்ற இருமொழிப் படத்திற்குக் கொடுக்கப்பட்டதற்காக 'அனல்' அரசுவுக்குக் கிடைத்திருக்கிறது. இதே ஆண்டில் இவர் சண்டைப் பயிற்சி அமைத்த 'நான் மகான் அல்ல' படத்திற்குத்தான் கிடைத்திருக்கவேண்டும்.'' எனத் தன் ஆதங்கத்தை வலைதளங்களில் பகிர்ந்திருக்கிறார், இயக்குநர் சுசீந்திரன். 

''இந்த விருது அறிவிப்பு எனக்கு ஆச்சரியத்தைத் தருகிறது. 'அங்காடித் தெரு' படத்தில் என் நடிப்பை மக்கள் இன்றும் பாராட்டுகிறார்கள். ஆனால், 2009-ஆம் ஆண்டிற்கான சிறந்த வில்லன் நடிகருக்கான விருது 'வில்லு' படத்தில் நடித்த பிரகாஷ் ராஜூக்குக் கொடுக்கப்பட்டிருக்கிறது. எந்த அடிப்படையில் இதைக் கொடுத்தார்கள் என்று தெரியவில்லை. தேர்ந்தெடுத்த நடுவர்கள் யார் என்பதையும் அரசு அறிவிக்கவில்லை.'' எனத் தன் எதிர்வினையைப் பதிவு செய்திருக்கிறார், ஏ.வெங்கடேஷ்.

''ஒவ்வொரு ஆண்டும் தேர்ந்தெடுக்கப்படும் சிறந்த திரைப்படங்களுக்கு 2 லட்சம் ரூபாய் ரொக்கம், நினைவுப் பரிசு மற்றும் சான்றிதழ் வழங்கப்படும். இரண்டாம் இடம் பிடிக்கும் திரைப்படங்களுக்கு 1 லட்சம், நினைவுப் பரிசு மற்றும் சான்றிதழ் வழங்கப்படும். மூன்றாம் இடம் பெறும் திரைப்படத்திற்கு 75,000 ரூபாய் ரொக்கம், நினைவுப் பரிசு மற்றும் சான்றிதழ் வழங்கப்படும். பெண்களைப் பற்றி உயர்வாகச் சித்தரிக்கும் திரைப்படத்திற்கு 1.25 லட்சம் ரூபாய் ரொக்கம், நினைவுப் பரிசு மற்றும் சான்றிதழ் வழங்கப்படும். இதுதவிர, சிறந்த நடிகர், நடிகை மற்றும் தொழில்நுட்பக் கலைஞர்களுக்கு 5 பவுன் தங்கப் பதக்கமும், நினைவுப் பரிசு மற்றும் சான்றிதழ் வழங்கப்படுகின்றன.'' - இது தமிழக அரசு ஆண்டுதோறும் வழங்கும் திரைப்பட விருதுகளுக்கான வெகுமதி. எதற்காக இதெல்லாம்... 'திரைப்படத் துறையை ஊக்கப்படுத்துவதற்காக!' என்கிறது தமிழக அரசின் திரைப்பட விருதுகளுக்கான விரிவுரை. நிலை அப்படியா இருக்கிறது? 

அரசியலுக்கு அப்பாற்பட்ட, பொறுப்புணர்ச்சிக்கு உட்பட்ட துறை சினிமா. பல வருடங்களுக்குப் பிறகு வழங்கப்படும் திரைப்பட விருதுகளின் தேர்வில் நேர்மையும் இல்லை, உண்மையும் இல்லை. பலவீனமான தமிழக அரசு இன்னும் பல எதிர்வினைகளைச் சந்திக்கும் என்பதிலும் சந்தேகம் இல்லை!

Do you like the story?

Please Appreciate the Author by clapping!