``ஆச்சர்யப்பட எதுவுமே இல்லை. அப்பா ஆயிரம் படத்துக்குமேல நடிச்சிருப்பார். பிள்ளைங்ககிட்டகூட உட்கார்ந்து பேச நேரமில்லாத அளவுக்கு பிஸியா இருந்தார். அதனாலேயே என்னவோ, சினிமா என்கிட்ட ஒட்டல. பள்ளி நாள்கள்ல விளையாட்டுல ஆர்வம் இருந்தது. பி.காம் ஸ்போர்ட்ஸ் கோட்டாவுல படிச்சேன். படிப்பு முடிஞ்சதும் பல கம்பெனிகள், பல வேலைகள், பல ஊர்களுக்குச் சுத்தியிருக்கேன். அந்த நாள்கள்லதான் `நாம யார்’ங்கிற ஒரு தேடல் முதன்முதலா எனக்குள்ள வந்தது. லால்குடியில் ஒரு மாமா, நாமக்கல்ல ஒரு மாமானு என்னோட ரெண்டு மாமன்கள் ஆன்மிக நாட்டத்தோடு இருந்தாங்க. அந்தத் தாக்கமும்கூட என்னை இந்தப் பயணத்துக்குத் திருப்பியிருக்கலாம்."

``2009-ல் அப்பா காலமானார். பிறகு சில சித்தர்கள் கனவுல வந்து, `நீ என்ன சொன்னாலும் நடக்கும்'னு அருள்வாக்கு சொல்ல தைரியம் தந்தாங்க. கொஞ்சநாள்ல ஒரு மத்தியான வேளையில சீரடி சாய்பாபா காட்சி தந்தார். விபூதி மாதிரி எதையோ என் கையில கொடுத்து, `இன்றிலிருந்து நீ எது கொடுத்தாலும் மருந்தாகும்’னு சொன்னார். 2014 கிறிஸ்துமஸ் அன்னைக்கு இயேசு காட்சி தந்தார். சித்தர்கள் முதல் ஜீசஸ் வரை பார்த்து உணர்ந்த பிறகுதான், என் ஆன்மிகத்தை நானே நம்பத் தொடங்கினேன்."

``ஆன்மிகத்தை வியாபாரமா நினைக்கிறவங்களாலதான், `கார்ப்பரேட் சாமியார்'ங்கிற வார்த்தை வந்தது. எனக்கு அந்த நினைப்பே கிடையாது. இன்னைக்கும் வாடகை வீட்டுலதான் இருக்கேன். நானா போய் `எங்கிட்ட வாங்க, அதைச் செய்றேன், இதைச் செய்றேன்’னு சொன்னதில்லை. தேடி வர்றவங்களை மட்டுமே சந்திக்கிறேன். ஆனாலும், இப்போ வெளிநாடுகள்ல இருந்தெல்லாம் என்னைத் தேடி ஆள்கள் வர்றாங்க."

``மாதத்தில் பாதி நாள்கள் சென்னையில இருப்பேன். மீதி நாள்கள் மலேசியாவுல இருப்பேன். என் மனைவி அங்கேதான் இருக்காங்க. ('சாமியார்னதும் கல்யாணம் பண்ணிக்காத பிரம்மசாரியா இருப்பேன்னு எதிர்பார்த்து வந்தியா கண்ணா’ எனச் சிரிக்கிறார்.)"

``நீ என்ன கேட்க வர்றன்னு புரியுது. என் கண்ணுக்குத் தெரிஞ்ச நம்பரைத்தான் என்னால சொல்லமுடியும். 342 சீட் மத்தியில மோடி பிடிப்பார்னு எனக்குக் காட்டப்பட்டிருக்கு. மாநிலத்துல 22 முதல் 28 தொகுதி அ.தி.மு.க - பா.ஜ.க கூட்டணிக்குக் கிடைக்கலாம். மற்றதை 23-ம் தேதிக்குப் பிறகு பேசிக்கலாம்." என்று முடித்தார்.