Published:Updated:

OTT கார்னர்

OTT கார்னர்
பிரீமியம் ஸ்டோரி
News
OTT கார்னர்

எந்த லாஜிக்கும் தேவையில்லாத த்ரில்லர் பாணி ரசிகர் என்றால், நிழல் உங்களை ஈர்க்கலாம்.

OTT கார்னர்

Invincible - series

நூற்றுக்கணக்கான சூப்பர் ஹீரோக்கள் சூழ் உலகு. அவர்களை ஒரு ஏஜென்ஸி வழிநடத்துகிறது. ஆனால், இந்தக் கட்டுப்பாடுகளுக்குள் சிக்காமல் ஒன்மேன் ஆர்மியாக வலம் வருகிறார் அதீத சக்திவாய்ந்த நோலன் கிரேசன் எனும் ஆம்னி மேன். அவரின் 17 வயது மகன் மார்க்கும் சக்திகள் பெறத் தொடங்க, ‘இன்வின்சிபிள்’ எனும் பட்டம் ஏற்கும் மகனை வழிநடத்துகிறார் நோலன். ஒரு கட்டத்தில் நோலனின் எண்ணம் இந்த உலகைக் காப்பதில்லை என்ற உண்மை தெரிய வருகிறது. அப்பாவும் மகனுமே எதிரெதிர் சித்தாந்தங்களுடன் நிற்க, இறுதியில் என்னவானது என்பதை ரத்தம் தெறிக்கத் தெறிக்கச் சொல்கிறது இந்த அனிமேடட் சிரீஸ். ‘இமேஜ் காமிக்ஸ்’ன் கதைகளுக்கு உயிர்கொடுத்து முதல் சீசனில் வெளியாகியிருக்கும் 8 எபிசோடுகளும் அனிமேஷன் என்பதை மறக்கடிக்க வைத்து கதையுடன் நம்மை ஒன்றவைக்கின்றன. 2-டி அனிமேஷன் என்றாலும் முழுக்க அடல்ட்ஸ் ஒன்லி கன்டென்ட். அத்தனை வன்முறை, வன்மம், அச்சமூட்டும் கிராபிக்ஸ்! ஆனால், சூப்பர்ஹீரோ ஃபேன்ஸ் பார்த்துவிட்டு நிச்சயம் ஆம்னி மேனுக்கும், இன்வின்சிபிளுக்கும் ஹார்ட்டின் விடுவார்கள்.

OTT கார்னர்
OTT கார்னர்

நிழல் - Movies

விபத்தொன்றிலிருந்து மீண்டு வருகிறார் நீதிபதியான குஞ்சகோ போபன். இன்னொரு பக்கம், சிறுவன் ஒருவன் சொல்லும் மர்மக் கதைகள் கடந்த காலத்தில் நடந்தவைகளாக விரிகின்றன. இந்த இரண்டு நபர்களும் சந்திக்கும் புள்ளி தான் அமேசான் ப்ரைமில் வெளியாகியிருக்கும் மலையாள சினிமாவான `நிழல்.’ சிறுவனின் அம்மாவாக நயன்தாரா. படம் முழுக்க வரும் சின்னச் சின்ன சம்பவங்கள்தான் படத்தை நகர்த்திச் செல்கின்றன. மழை, கதை, மாஸ்க் என ஆங்காங்கே நம்மை அது ஈர்க்கவும் செய்கிறது. சுவாரஸ்யமான பாக்கெட் நாவல் ஒன்லைன்தான். முக்கால்வாசிப்படம் விறுவிறுப்பாகச் செல்ல, கடைசி அரை மணி நேரத்தில் ஏமாற்றம். குஞ்சகோ போபன் வீட்டிலிருக்கும் நாய் தரும் முகபாவனைகளைக்கூட மற்றவர்கள் தர மறுக்கிறார்கள். க்ளைமாக்ஸ் நெருங்கும் வேளையில் சம்பந்தமே இல்லாமல் வில்லனை அறிமுகம் செய்வதெல்லாம் காலாவதி ஸ்டைல் பாஸ். எந்த லாஜிக்கும் தேவையில்லாத த்ரில்லர் பாணி ரசிகர் என்றால், நிழல் உங்களை ஈர்க்கலாம்.

OTT கார்னர்
OTT கார்னர்

நாயாட்டு - Movies

தலித்துகளுக்கு சாதகமாக நடந்துகொள்வதற்காக அரசாங்கம் மூன்று காவல்துறை அதிகாரிகளை ‘வேட்டை’யாடத் தயங்காது என்று சொல்கிறது, நெட்ஃபிளிக்ஸில் வெளியாகியிருக்கும் ‘நாயாட்டு’ மலையாளத் திரைப்படம். தற்செயலாக நிகழும் சம்பவங்கள் எப்படி சிலரை மொத்தமாய் உலுக்குகிறது என்பதாக விரிகிறது கதை. ஆனால், அதனுள் அத்தனை விஷமத்தன அபத்தங்களை உள் நுழைத்திருக்கிறார் இயக்குநர். அமைப்பாகத் திரண்டிருக்கும் தலித்துகள்தான் இந்தியாவின் ஆகப்பெரும் பிரச்னை என்பதை நிறுவப் போராடுகிறார் இயக்குநர். எங்கோ நிகழும் ஒன்றிரண்டு சம்பவங்களைப் பொதுமைப்படுத்த முடியாது. ஆனாலும், அப்படி ஒரு விஷயத்தை எடுத்தே கதையாக்கி இருக்கிறார். ‘பாதிக்கப்பட்டதாகச்’ சொல்லும் இரு போலீஸ் அதிகாரிகளும் தலித்துகள் என்னும் சித்திரிப்பே செயற்கையாக இருக்கிறது. படம் அதன் த்ரில்லருக்காகக் கொண்டாடப்பட்டாலும், படைப்பாளிகளுக்கு சமூக அரசியல், இந்திய வரலாறு பற்றிய புரிதல்கள் மிகவும் அவசியம்; என்பதை மீண்டும் உறுதி செய்கிறது நாயாட்டு.

OTT கார்னர்
OTT கார்னர்

Things Heard & Seen - Movies

எக்கச்சக்க ஹாரர் படங்களை இறக்குமதி செய்துவரும் நெட்ஃபிளிக்ஸின் சமீபத்திய வரவு இந்தப் படம். கதை காலங்காலமாக ஹாலிவுட் புழங்கும் அதே ஏரியாதான். கொடூர மரணங்கள் நிகழ்ந்த வீட்டிற்கு தங்கள் மகளோடு குடிவருகிறார்கள் ஒரு இளம் தம்பதி. கணவருக்கு மட்டுமே தெரிந்த அந்த வீட்டின் ரகசியங்கள் ஒருகட்டத்தில் மனைவிக்கும் தெரிய, அதன்பின் அவர்களுக்குள் நிகழும் சண்டை, இடையே நல்ல பேய் Vs கெட்ட பேய் என கதை எங்கெங்கோ சுற்றி ஒருவழியாக க்ளைமாக்ஸை அடைகிறது. இது ஹாரர் படமா அல்லது த்ரில்லரா எனத் தெரியாத குழப்பம், சுலபமாய் யூகிக்க முடிந்த காட்சியமைப்புகள் என, படம் நீண்டுகொண்டே செல்வதாய்த் தோன்றும் பிரமையே அயர்ச்சிக்குள்ளாக்குகிறது. வழக்கமாய் காமெடி படங்களில் வெளுத்துவாங்கும் அமண்டா செஃப்ரெய்டின் நடிப்பு மட்டுமே இதில் ஒரே ஆறுதல். நெட்ஃபிளிக்ஸின் கன்டென்ட் புதையலில் வெகுவிரைவில் காணாமல்போய்விடும் இந்தப் படம்.

OTT கார்னர்