Vikatan.com

www.vikatan.com would like to send you push notifications.

Notifications can be turned off anytime from browser settings.

"ஶ்ரீதேவி... இந்திய சினிமாவின் ஜெயலலிதா!" - ஆர்.அபிலாஷ்

Chennai: 

"ஶ்ரீதேவி மறைந்தது, மறைந்ததுபோலவே இல்லை. ஓர் அழகான பக்கத்துவீட்டுப் பெண் தன் வீட்டுக்குச் சென்று கதவை சாத்திக்கொண்டது போல இருக்கிறது” என ஒரு ஸ்ரீதேவி ரசிகர் என்னிடம் சொன்னார். நான் கவனித்த வரையில் பல ரசிகர்களின் மனநிலையும் இப்படித்தான் இருக்கிறது.

ஒரு பக்கம் மனம் உடைந்தாலும், இன்னொரு பக்கம் இது ஒரு பொய் செய்தி என நினைக்கிறார்கள். ஒரு நடிகர் வயதாகி நம் கண்முன்னே உருமாறி சட்டென மறையும்போது அவரைப் பற்றி நினைவில் மீட்டி சிந்திக்க நமக்கு அவகாசம் கிடைக்கிறது. நடிப்பு வாழ்வின் உச்சத்தில் ஒருவர் சட்டென மாய்ந்தால் அப்போது நம்மால அரற்றி அழ முடியும். ஆனால், ஸ்ரீதேவியோ இந்திய சினிமாவின் முதல் பெண் சூப்பர் ஸ்டாராக உருவாகி நீண்ட காலம் அரியணையை அலங்கரித்த பின் தானாகவே அதைவிட்டு அகன்று மனைவியாக, தாயாக எளிய வாழ்க்கை வாழ்ந்து ஒருநாள் English Vinglish (2011) எனும் படம் மூலமாக மீண்டும் திரையுலகில் கோலோச்சத் திரும்பினார். அவரது திரைவாழ்வின் இந்த இறுதிக்கட்டம்கூட வெகு அட்டகாசமாய் ஆர்ப்பாட்டமாய் பெரும் வெற்றியாய் அமைய, இதை இறுதிக்கட்டம் என நினைக்கவே நமக்குத் தோன்றவில்லை. 

ஶ்ரீதேவி

அவரது இந்த எதிர்பாராத விடைபெறல் ஒரு மரணம் போலவே இல்லை பல ரசிகர்களுக்கும். படம் முடிந்து திரை விழுந்து அவர் தற்காலிகமாய் மறைந்தது போன்றே உள்ளது. துக்கத்தைவிட விம்மல்களும் ஏக்கமும் வியப்புமே இப்போது நம்மை ஆக்கிரமிக்கும் உணர்ச்சிகள். இன்னும் சற்று காலம் நாம் அத்திரையையே வெறித்துப் பார்த்து அமர்ந்திருக்கப் போகிறோம்!

அழகும் திறமையும்...

ரஜினி, கமல் போன்ற அபாரமான நடிகர்களுடன் நடிக்கையில் தன்னை இணையாக ஸ்தாபிக்க முடிந்த ஒரே நடிகை ஸ்ரீதேவிதான். அதாவது, சிம்ரன், ஜோதிகா, ஊர்வசி போன்றோர் திறமையாளர்களே. ஆனால், ஆண் நடிகர்களுடன் போட்டியிட்டு அவர்களை ஓரங்கட்டும் ஆளுமை அவர்களுக்கு இருந்ததில்லை. இதுவே இவரின் தனித்தன்மை. ஒருவிதத்தில் 'இந்திய சினிமாவின் ஜெயலலிதா' என அவரை அழைக்கலாம். படக்கருவி முன் நின்றதும் தன்னிச்சையாக அவர் நடிக்கத் துவங்கிவிடுவார் என்கிறார்கள், அவரை இயக்கியவர்கள். வேறு எந்த நடிகையையும்விட தயக்கமற்ற தன்னம்பிக்கை மிக்க நடிகையாக அவர் இருந்தார். இவ்விஷயத்தில் அவரது திரை ஆதிக்கம் பானுமதியுடன் ஒப்பிடத்தக்கது.

300-க்கும் மேற்பட்ட படங்கள். ஸ்ரீதேவி தோன்றினால் போதும் படம் ஓடும் எனும் உத்தரவாதம் தரும் அளவுக்கு நீண்ட காலம் பாலிவுட்டில் கோலோச்சியவர். 2013-ல் பத்மஸ்ரீ விருதைப் பெற்றவர்.

ஶ்ரீதேவி

ஸ்ரீதேவியின் அப்பா தமிழர்; அம்மா ஆந்திராவைச் சேர்ந்தவர். நான்கு வயதில் துவங்கி தன் மரணம் வரை நடித்துக்கொண்டே இருந்த அவருக்கு, சினிமா கிட்டத்தட்ட சுவாசிப்பதைப் போன்றது.

90-களில் மிக அதிகமாய் ஊதியம் பெற்ற நடிகையாக இருந்தார். 2013-ல் சி.என்.என் ஐ.பி.என் நடத்திய தேசியக் கருத்துக்கணிப்பில் கடந்த நூறு வருடங்களில் இந்தியாவில் தோன்றிய ஆகச்சிறந்த நடிகை எனும் விருதைப் பெற்றார். 

1997-ல் போனி கபூரை மணந்தபின் நடிப்பில் இருந்து ஓய்வுபெற்ற அவர், 2004-ல் திரும்பினார். பிப்ரவரி 24, 2018-ல் துபாயில் தனது உறவினர் ஒருவரது வீட்டுத் திருமணத்தில் கலந்துகொள்ளச் சென்றிருந்தபோது மாரடைப்பில் மரணமடைந்தார். 

பேபி ஸ்ரீதேவியில் இருந்து விஜி வரை...

இயக்குநர் ஷேகர் கபூர் ஒரு முறை ஸ்ரீதேவியை திரையில் ஜொலிக்கும் ஒரு குழந்தைப்பெண் என வர்ணித்தார். 'இவர் ஏன் இந்திய ரசிகர்களின் மனம் கவர் நாயகியாக இருபதாண்டுகள் திகழ்ந்தார்?' எனும் கேள்விக்கு உடனடி பதில் தரும் அவதானம் இது. ஸ்ரீதேவி கச்சிதமான ஓர் அழகி அல்ல. மாதுரி தீக்‌ஷித்தோ ஐஷ்வர்யா ராயோ அவரைவிட சீரான பெண்மை நளினமும் கொண்டவர்கள். ஆனால், ஸ்ரீதேவியிடம் வேறொரு தனித்துவம் இருந்தது. ஒரே சமயம் பெண்மையின் கவர்ச்சியும் அதற்குப் பொருத்தமற்ற குழந்தைத்தனமான முகபாவனைகள், உடலசைவுகள் மற்றும் குரல் அவரிடம் இருந்தன. மனதை கொள்ளை கொள்ளும் இரண்டு எதிர் குணங்களின் ஒரு அற்புதமான கலவையாக அவர் அமைந்தார். `மூன்றாம் பிறையின்' விஜி கேரக்டரை இவரைவிட சிறப்பால் வேறு யாரால் நடித்திருக்க இயலும்? ஸ்ரீதேவிக்கு அப்பாத்திரத்தின் அடிப்படையான இயல்பு மிக சுலபமாகக் கைவந்ததற்கு அதுவே அவரது ஆளுமையின் அடிப்படை என்பதும் ஒரு காரணமா?

ஶ்ரீதேவி

ஒரு குழந்தையின் நினைவுகள் மட்டுமே கொண்ட வளர்ந்த பெண்ணாக மாறும் விஜி பெண்மையின் பூரணத்துவமும் குழந்தைமையின் விளையாட்டுத்தனமும் களங்கமின்மையும் அபூர்வமாய் இணையும் புள்ளியாக இருக்கிறாள். இதே பாத்திரத்தைத்தான் வெவ்வேறு வகைகளால் ஸ்ரீதேவி தன் ஒவ்வொரு அழகு சொட்டும் கதாபாத்திரங்களிலும் இந்தியிலும் தமிழிலும் நிகழ்த்தினார் எனலாம். ஸ்ரீதேவிக்கு இது மிக இயல்பாக வந்தது. பெண்மையின் சீண்டும் கவர்ச்சி ஒரு புறமும், அதே உடலில் தொடர்ந்து ஒருவித குழந்தைத்தனத்தையும் அவர் அழகாய் இடறல் இன்றி தக்கவைத்தார். இதுவே, ஆண்களைப் பெருமளவில் ஈர்க்கக் காரணமானது எனலாமா? ஆம் எனில் ஏன், எப்படி?

உளவியலாளர் டெஸ்மண்ட் மோரிஸ் உலகம் முழுக்க ஆண்களிடம் பெண்களை ஈர்க்கச் செய்யும் அம்சங்கள் எவை என ஆய்வு செய்து ஒரு முடிவுக்கு வருகிறார்: வளர்ந்தும் தம்மை குழந்தையாகக் காட்டும் பெண்களே ஆண்களை அதிகமாகத் தூண்டுகிறார்கள். அவர்கள் பாதுகாக்கவும் அரவணைக்கவும் அவர்கள் தூண்டப்படுகிறார்கள். தம்மை அறியாது பெண்ணுடலிலும் உடல்மொழியிலும் ஒரு குழந்தையின் பல சுபாவங்கள் வளர்ந்த பின்னும் நிலைக்கின்றன. உலகம் முழுக்கப் பெண்களின் கூந்தல், சருமம், குரல் மற்றும் உடலசைவுகள் குழந்தைகளை ஒத்திருப்பதை மோரிஸ் குறிப்பிடுகிறார். எஸ்டிரோஜென் மற்றும் புரொஜெஸ்டிரோன் எனும் பெண்மை ஹார்மோன்கள் அதிகமுள்ள பெண்கள் தம்மை 'விஜி'களாய் காட்டிக்கொள்ளும் இயல்பு கொண்டவர்கள் என்கிறது ஓர் ஆய்வு. சதா ஒரு முதிர்ச்சியற்ற விளையாட்டுத்தனம், படபடவென எதையாவது விதவிதமாய் வெளிப்படுத்தும் மிகை ஆற்றல், கொஞ்சலான சிரிப்பு என ஸ்ரீதேவித்தனம் கொண்ட பெண்களிடம், ஆண்கள் தயங்காமல் மண்டியிடுவார்கள். இந்த எஸ்டுரோஜென் கனவுப்பெண்ணாக தான் ஏற்ற ஒவ்வொரு நாயகி பாத்திரத்தின் ஊடும் ஸ்ரீதேவி வெளிப்பட்டார். இது ஒரு சாதாரண நிகழ்வல்ல. நூறாண்டுகளுக்கு ஒருமுறை நிகழும் ஓர் அற்புதம் இது. ஒரு பண்பாட்டு அதிசயமாக மலர்ந்த ஸ்ரீதேவி இவ்வாறாக இந்தியக் கூட்டுமனத்தின் ரகசிய கடவுச்சொல்லைக் கண்டடைந்தார்.

ஶ்ரீதேவி

'துணைவன்' படத்தில் நான்கு வயதில் முருகனாக தன் நடிப்பு வாழ்வை ஆரம்பித்த ஸ்ரீதேவி, தொடர்ந்து 'கந்தன் கருணை', 'நம் நாடு', 'வசந்த மாளிகை' எனப் பல படங்களில் குழந்தை நட்சத்திரமாக ஜொலித்தார். 1971-ல் 'பூம்பாற்றா' எனும் மலையாளப் படத்திற்காக சிறந்த குழந்தை நட்சத்திரத்திற்கான தேசிய விருதைப் பெறுகிறார். பாலசந்தரின் 'மூன்று முடிச்சு' படத்தில் நாயகி ஆகும்போது இவருக்கு 13 வயது. 'காயத்ரி' மற்றும் 'பதினாறு வயதினிலே' ஆகிய வெற்றிப் படங்களில் ரஜினி மற்றும் கமலுக்கு நாயகி ஆகும்போது அவருக்கு வயது 14. அக்காலத்தில் இது வழமை என்றாலும், இவரது பதின் தோற்றம் அப்போதிலிருந்தே குழந்தைமைக்கும் பெண்மைக்கும் நடுவில் உறைந்துபோன ஒன்றாக இருந்தது. அவருக்குக் கிடைத்த பாத்திரங்களும் அவ்வாறே அமைந்தன. வளர்ந்து முதிர்ந்த பின்னரும் ஸ்ரீதேவி மனதளவில் தன்னுள்ளும் ரசிகர், ரசிகைகளின் மனதிலும் மலர்ந்தும் மலராத பாதி மலராகவே நீடித்தார். 

70-களில் சூடா மலராகத் தொடங்கி 2000-த்தில் ஒரு முதிர்கன்னியான பின்னரும் பார்வையாளர்களின் இதயத்துடிப்பை அவர் தொடர்ந்து எகிறவிட்டதன் ரகசியம் ஒரு குழந்தையாகவும் பெண்ணாகவும் ஓருடலில் நீடிக்க முடிந்ததுதானா?

பாலு மகேந்திராவுக்கு முன்னரே, 'பதினாறு வயதினிலே' படத்தில் மயிலாகத் தோன்றி விஜியை முதலில் நமக்கு திரை அகற்றிக் காட்டியவர் இவர் அல்லவா? 'பதினாறு வயதினிலே' மயில் குழந்தைப் பெண்ணாக இருந்து டாக்டரிடம் தன் பெண் மனதைக் கண்டடைந்து, அந்தக் கன்னிமையை இழந்து, ஒரு முழுப்பெண்ணாக மலர்ந்து கமலிடம் தன்னை ஒப்புக்கொடுக்க முடிவெடுத்து அதிலும் தோற்கிறார். 'மூன்றாம் பிறையில்' முழுப்பெண்ணிலிருந்து குழந்தைப்பெண்ணாகப் பின்னால் செல்கிறார். பெண்ணாகத் தன்னை மீட்டெடுக்கும் இடத்தில் அவர் மீண்டும் கமலைக் கைவிடுகிறார். இந்திய ரசிகர்கள் எழுபதுகளிலிருந்தே இந்தக் கமலைப் போன்றல்லவா இருந்தார்கள்? இந்த இரண்டு எதிர்நிலைகளிலும் அவர்கள் ஸ்ரீதேவியை தேடித் தேடி தோற்கவில்லையா? குரங்காக நடித்து தம்மை நிரூபிக்க முயன்று பரிதவிக்கவில்லையா?

பெண் சாப்ளின்...

நட்சத்திரங்களை எண்ணுவதைவிட சிரமமான காரியம் எது தெரியுமா? இவர் நடித்த சில பாடல்களில் அவரது மாறும் முகபாவனைகளை எண்ணுவது. குறிப்பாக அந்த 'ஹவா ஹவாய்' இந்திப் பாடல். சட்சட்டென மாறும் அந்த வேகம், ஒரு சின்னக் காட்சிக்குள் நூறு சிறு நுணுக்கங்களை காட்டும் லாகவம், சற்றும் தயங்காத நடிப்பின் சரளத்தன்மை, எந்தவித உணர்ச்சிக்கும் தன்னுடலை ஒப்புக்கொடுக்கும் அர்ப்பணிப்பு... இவையெல்லாம் ஸ்ரீதேவியை இரு பெரும் நடிகர்களுடன் நம்மை ஒப்பிடத் தூண்டுகிறது: சார்லி சாப்ளின் மற்றும் கமல்.

சாப்ளினை ஸ்ரீதேவியும் கமலும்போலச் செய்திருக்கிறார்கள். இக்காட்சிகளைக் கண்டோமானால் இருவருக்குமான வித்தியாசமும் ஒற்றுமையும் புலப்படும்.

ஶ்ரீதேவி

கமலின் 'சாப்ளின் செல்லப்பா' (புன்னகை மன்னன்) உங்களுக்கு நினைவிருக்கும். கண்ணசைவில், முகபாவனைகளில், பாதங்களை வெளிப்புறமாய் திருப்பி நடப்பதில், மின்னல் சைகைகளில் என அங்குலம் அங்குலமாய் கமல் அதில் சாப்ளினைப்போல செய்திருப்பார். அபாரமான நடிப்பு அது. 'மிஸ்டர் இந்தியா' இந்திப் படத்தில் ஸ்ரீதேவி இதேபோல் சாப்ளின் வேடத்தில் ஒரு சூதாட்ட கிளப்புக்குச் செல்வார். வெகுபிரசித்தமான நகைச்சுவைக் காட்சி அது. இதில் ஸ்ரீதேவி, கமலைப்போல சாப்ளினைப்போல செய்ய மாட்டார். தனக்கு வெகு இயல்பாக வரும் குழந்தைத்தனமான வெகுளியான சுபாவத்தை சாப்ளினின் சேஷ்டைகளுடன் சேர்த்து வெளிப்படுத்தியிருப்பார். எந்தப் பாத்திரத்திலும் அவர் தன்னை இழப்பதில்லை. அவர் ஜெயலலிதாவாக  ஒருவேளை நடித்திருந்தாலும், அதை ஒரு ஸ்ரீதேவித்தனமான ஜெயலலிதாவாகவே வெளிப்படுத்தியிருப்பார். இவ்விசயத்தில் ஸ்ரீதேவியின் நடிப்பு பாணி மோகன்லால், அமிதாப் பச்சன், நஸ்ருதீன் ஷா, விஜய்சேதுபதி ஆகியோருடையது. கமல், சூர்யா, சிவாஜி ஆகியோர் பிரக்ஞைபூர்வமாய் தம்மை இன்னொருவராய் மாற்றும் நடிப்பு பாணியைச் சேர்ந்தவர்கள்.

இந்தச் சாப்ளின் காட்சியைப் பார்க்கையில் ஸ்ரீதேவிக்கும் கமலுக்குமான ஒரு முக்கிய ஒற்றுமை தனித்துத் தெரியும். ஒரு காட்சியில் இருபதுக்கு மேற்பட்டோர் வந்தாலும், ஸ்ரீதேவி தனி ஒருவராக அத்தனை பேரையும் ஓரம் கட்டி விடுவார். பார்வையாளர்களின் கவனம் முழுக்க அவர் வசமே இருக்கும். அவ்வளவு துடிப்பாக, முகபாவத்தில், உடல்மொழியில் தொடர்ந்து புதுப்புது நுணுக்கங்களை காட்டியபடி இருப்பார். கமல் மௌனமாக நடிக்க வேண்டிய காட்சியில்கூட எப்படியாவது பார்வையாளனைத் தன் வசம் கட்டிப் போட்டு விடுவார்.

ஶ்ரீதேவி

ஸ்ரீதேவியைப் போன்ற திறமையும் அழகும் கொண்ட மற்றொரு நடிகை இனிமேலும் தோன்றலாம். ஆனால், ஒரு பெண் எப்படியெல்லாம் இருக்க வேண்டும் எனும் நம் கற்பனையை அவரளவுக்குத் தூண்டி ஒரு பெரும் ஜுவாலையாய் வளர விடும் நடிகை இனி வர வாய்ப்பே இல்லை! ஸ்ரீதேவியுடன் கவர்ச்சியும் களங்கமின்மையும் ஒரு சேர இணைந்த ஒரு பெண் பிம்பமும் இந்திய மனதிலிருந்து மறைந்து விட்டது.
 

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

MUST READ

Advertisement

எடிட்டர் சாய்ஸ்