சினிமா விமர்சனம்: சைக்கோ

`கொடூரக் குற்றவாளிகள் பிறப்பதில்லை; உருவாக்கப்படுகிறார்கள்’ என மிஷ்கின் சொல்லும் ரத்தம் தெறிக்கும் நீதிக்கதையே இந்த `சைக்கோ.’

கோவை வட்டாரத்தில் மர்மமான முறையில் காணாமல்போகும் பெண்கள், சில நாள்கள் கழித்து வெறும் உள்ளாடைகளுடன் தலையற்ற உடல்களாக, கிடைக்கிறார்கள். அந்தக் கொலைகளைத் திட்டமிட்டு நிகழ்த்தும் சைக்கோ கில்லரின் அடுத்த குறி அதிதி ராவ். நகரையே நடுங்கவைக்கும் அக்கொடூரக் கொலைகார னிடமிருந்து அவரை மீட்கப் போராடுகிறார் அதிதியைக் காதலிக்கும், பார்வைச் சவால் கொண்ட உதயநிதி. இவர்களுக்குள் நடக்கும் கண்ணாமூச்சி ஆட்டத்தை ரத்தமும் இருளும் இசையும் பிசைந்து காட்சிப்படுத்தியிருக்கிறார் மிஷ்கின்.

உதயநிதிக்கு இதுவரை ஏற்றிடாத கதாபாத்திரம். உடல்மொழியிலும் உணர்ச்சி களிலும் மாற்றுத்திறனாளியாய் நம் முன் மிளிர நிறையவே மெனக்கெடுகிறார். நீதிக்கதைகளில் வரும் தேவதைபோல அதிதி ராவ். பலியானவர்களுக்காக அவர் நடுங்கி மருகும் இடங்கள் க்ளாஸ்! விறைத்த பார்வையோடு திரையில் தோன்றும்போதெல்லாம் பதறவைக்கிறார் ‘சைக்கோ’ ராஜ்குமார். ரேச்சல் டீச்சராக சில காட்சிகளிலேயே மிரட்டியிருக்கிறார் ப்ரீத்தம். நித்யா மேனன், இயக்குநர் ராம், சிங்கம்புலி, பவா செல்லதுரை, ஷாஜி என ஏனைய நடிகர்களிடம் மிஷ்கின் சாயலே மிகுதி.