Published:Updated:

நான்கு இயக்குநர்கள் இணையும் `ஆந்தாலஜி படம்’ - வெற்றிமாறன் போர்ஷனில் சாய் பல்லவி!

வெற்றி மாறன் இயக்கத்தில் சாய் பல்லவி நடிக்கவுள்ளார்.

சாய் பல்லவி
சாய் பல்லவி

நெட்ஃபிளிக்ஸ் தளத்தில் வெளியான ஆந்தாலஜி படம் 'லஸ்டு ஸ்டோரிஸ்'. பாலிவுட்டின் முன்னணி நடிகர்களான விக்கி கவுஷல், ராதிகா ஆப்தே, கியாரா அத்வானி, மனிஷா கொய்ராலா உள்ளிட்டோர் நடிக்க கரண் ஜோஹர், ஜோயா அக்தர், அனுராக் காஷ்யப் உள்ளிட்ட இயக்குநர்கள் இயக்கி இருந்தனர். நெட்ஃபிளிக்ஸ் இணையத்தில் இந்தப் படத்துக்கு செம ரெஸ்பான்ஸ் கிடைத்தது. இதையடுத்து, தமிழில் உருவாகும் ஆந்தாலஜி படம் ஒன்றை வெற்றி மாறன், கெளதம் மேனன், சுதா கொங்கரா, விக்னேஷ் சிவன் ஆகிய நான்கு இயக்குநர்களும் ஒவ்வொரு கதையை எழுதி இயக்கவிருக்கின்றனர்.

வெற்றிமாறன்
வெற்றிமாறன்

இவர்கள் அனைவரும் ஆணவக் கொலையை மையமாக வைத்துதான் இந்த ஆந்தாலஜி படத்தை இயக்கவிருக்கின்றனர். அதில் விக்னேஷ் சிவன் இயக்கும் போர்ஷனில் அஞ்சலி, பாலிவுட் நடிகையும் அனுராக் காஷ்யப்பின் முன்னாள் மனைவியுமான கல்கி கோச்லின் ஆகியோர் நடிக்கின்றனர் என்ற செய்தி ஏற்கெனவே வெளியானது. இதைத் தொடர்ந்து, வெற்றி மாறன் இயக்கும் போர்ஷனில் பிரகாஷ் ராஜ், சாய் பல்லவி ஆகியோர் முன்னணி கதாபாத்திரத்தில் நடிக்க ஒப்பந்தமாகியுள்ளனர். சாய் பல்லவி தற்போது ராணாவுடன் 'விரட்டபர்வம்' படத்திலும் நாகசைதன்யாவுடன் ஒரு படத்திலும் நடித்து வருகிறார். பிரகாஷ் ராஜ் கைவசம் பல படங்கள் உள்ளன. தவிர, 'அசுரன்' வெற்றிக்குப் பிறகு, வெற்றிமாறன் சூரியை வைத்து காமெடி படம் ஒன்றை இயக்கவிருக்கிறார். அந்தப் படம் நா.முத்துக்குமாரின் 'பட்டாம்பூச்சி விற்பவன்' கவிதைத் தொகுப்பில் உள்ள 20 வரி கவிதையை மையமாக வைத்து எழுதப்பட்ட கதை என்பது குறிப்பிடத்தக்கது. கெளதம் மேனன் மற்றும் சுதா கொங்கரா இயக்கத்தில் யார் நடிக்கிறார்கள் என்பது விரைவில் வெளியாகும்.