"அம்மா ஆகப் போறேன்... ஸோ ஹாப்பி பிரேக்!" கல்யாணி

ஆறாவது மாசம் நடந்துட்டிருக்கு. இந்த நேரத்தில், என் அம்மாவை ரொம்பவே மிஸ் பண்றேன்.

"சென்னை பட்டணம் எல்லாம் கட்டணம்

கையை நீட்டினா காசு மழை கொட்டணும்"

இந்தப் பாடல் வரிகளைப் படித்ததும், பிரபுதேவா - லைலா நடிப்பில் வெளியான 'அள்ளித்தந்த வானம்' திரைப்படத்தில், அழகாக நடனமாடி ஈர்க்கும் குட்டிப் பெண் நினைவுக்கு வருவார். அவர்தான், கல்யாணி. அதன்பிறகு 7 வயதில், 'ஜெயம்' படத்தில் க்யூட் ரியாக்‌ஷன்ஸ் கொடுத்து நம் மனங்களில் இடம்பிடித்தவர். வெள்ளித்திரை, சின்னத்திரை என ஆல்ரவுண்டராக வலம்வந்தவர். விஜய் டி.வி-யில் ஒளிபரப்பான 'பிரிவோம் சந்திப்போம்' மூலம் சின்னத்திரைக்குள் என்ட்ரி கொடுத்தார். பரபரப்பாக சில சீரியல்களில் முத்திரைப் பதித்தவர், சட்டென திருமணமாகி செட்டில் ஆகிவிட்டார். பிறகு, ஜீ தமிழ் 'ஜூனியர் சீனியர்' நிகழ்ச்சியின் தொகுப்பாளராக ரீ-என்ட்ரி கொடுத்தார். தொடர்ந்து மீடியாவில் கலக்குவார் என எதிர்பார்த்திருந்த நிலையில், மீண்டும் பிரேக் எடுத்திருக்கிறார். 'மறுபடியும் என்ன ஆச்சு?' எனத் தேடினால், 'மறுபடியும் ஹேப்பியான பிரேக்தான்' எனத் தாய்மையுடன் புன்னகைக்கிறார்.

 

கல்யாணி

``திடீர் திடீர்னு பிரேக் எடுத்துட்டு கிளம்பிடறீங்களே...''

``என்னை ஞாபகம் வெச்சுட்டு தேடற அன்பு உள்ளங்கள் அனைவருக்கும் முதல் வணக்கம். நான் எங்கேயும் போயிடலைங்க. பெங்களூரில்தான் இருக்கேன். முதல் பிரேக் எடுத்தது, என் திருமணத்துக்கு. இப்போ, நான் அம்மாவாகப் போகிறேன். அதுக்கான பிரேக் இது.''

``வாவ்... பேபிக்கும் சேர்த்து வாழ்த்துகள். எத்தனையாவது மாசம்?"

``ஆறாவது மாசம் நடந்துட்டிருக்கு. இந்த நேரத்தில், என் அம்மாவை ரொம்பவே மிஸ் பண்றேன். முதல் மூன்று மாசமும் வளைகாப்பு முடிஞ்சதுக்கு அப்புறமும் அம்மா வீட்டுக்குத்தான் போவாங்க. ஆனா, அம்மாவோட இழப்பை என்னால தாங்க முடியலை. அம்மாவே எனக்குப் பொண்ணாகப் பிறக்கணும்னு ஆசை. நீங்களும் பிரார்த்தனை பண்ணிக்கங்க.''

``நிச்சயமா கல்யாணி... கர்ப்பகாலத்தில் என்னென்ன விஷயங்களைக் கடைப்பிடிக்கறீங்க?"

``ஸ்விம்மிங் கிளாஸுக்குப் போறேன். இப்போவரை ஸ்விம் பண்ணிட்டிருக்கேன், யோகா பண்றேன். மாமியார் என்னோடுதான் இருக்காங்க. சத்தான உணவுகளைத் தேர்ந்தெடுத்து கொடுக்கிறாங்க. நிறைய தமிழ்ப் பாடல்களை டவுன்லோட் பண்ணி கேட்கறேன். அப்புறம்... நிறைய டிராவல் பண்ணிட்டிருக்கேன்.''

கல்யாணி

 

``என்னது டிராவல் பண்றீங்களா?"

``ஆமாங்க. 7 மாசம் வரைக்கும் தாராளமா டிராவல் பண்ணலாம்னு டாக்டர் சொல்லியிருக்கார். ரீசண்ட்டா ஶ்ரீலங்கா, மலேசியா போயிட்டு வந்தேன். குழந்தைப் பிறந்ததுக்கு அப்புறம் டிராவல் பண்றதைவிட, இப்போ பண்றது புது அனுபவமா இருக்கு.''

``உங்க மருத்துவ கணவர் என்ன சொல்றார்?"

``அவருக்கு நிறைய மருத்துவ நண்பர்கள் இருக்கிறதால், சின்ன சந்தேகம்னாலும் கேட்டுப்போம். அன்பாகவும் அக்கறையாகவும் பார்த்துக்கிறார்.''

``சின்னத்திரை வாய்ப்புகள் தொடர்ந்து வருதா?"

``நிறைய வந்துச்சு. மாசமா இருக்கிறதால் மறுத்துட்டேன். சென்னையில் இருந்தாலும் கொஞ்ச டிரை பண்ணிருப்பேன். ஆனால், பெங்களூரில் இருக்கிறதால் முழுசா பிரேக் எடுக்க முடிவு பண்ணிட்டேன். கடைசியா, 'ஜூனியர் சீனியர்' நிகழ்ச்சியைத் தொகுத்து வழங்கினேன். 'கங்கா' சீரியலில் நடிச்சேன்.''

 

கல்யாணி

 

``நீங்க ஃபாலோ பண்ற பியூட்டி டிப்ஸ்...''

``வீட்டில் இருக்கும்போது எப்பவுமே மேக்கப் பண்றதில்லே. என் நண்பர்களுடன் ஷாப்பிங் போகும்போது சன்ஸ்கிரீன் லோஷன் போட்டுப்பேன். கண்களுக்கு காஜல் மட்டும்தான் போடுவேன். இதுதான் ரொம்ப வருஷமா ஃபாலோ பண்ற பியூட்டி டிப்ஸ்.''

``கம்பேக் கொடுப்பீங்களா?"

``நிச்சயமா. பாப்பா பிறந்ததுக்கு அப்புறம் மீடியாவில் என்னை எதிர்பார்க்கலாம். எப்போ வருவேன், எப்படி வருவேன்னு யாருக்கும் தெரியாது. வரவேண்டிய நேரத்துல கண்டிப்பா வருவேன்'' என பன்ச் அடிக்கிறார், 'ஸ்மைலிங் குயின்' கல்யாணி.

Do you like the story?

Please Appreciate the Author by clapping!