Published:Updated:

நேர்கொண்ட பார்வையும் `காவலனுக்கான' தேவையும்! - அஜித்தை பாராட்டிய காவல் துணை ஆணையர்

படத்தைப் பார்த்த திருநெல்வேலி காவல் துணை ஆணையர் அர்ஜுன் சரவணனின் ஃபேஸ்புக் பதிவு தற்போது வைரலாகி வருகிறது.

துணை ஆணையர் அர்ஜுன் சரவணன்
துணை ஆணையர் அர்ஜுன் சரவணன்

அஜித்தின் நடிப்பில் ஆகஸ்ட் 8-ம் தேதி வெளிவந்த திரைப்படம் `நேர்கொண்ட பார்வை'. பாலிவுட்டில் அமிதாப் பச்சன் நடித்து பரபரப்பான வெற்றியைப் பெற்ற `பிங்க்' திரைப்படத்தின் ரீமேக் தான் இந்தப் படம். `சதுரங்கவேட்டை', 'தீரன்' ஆகிய வெற்றிப் படங்களின் இயக்குநர் ஹெச்.வினோத் இயக்க ஷ்ரத்தா ஶ்ரீநாத், அபிராமி, ரங்கராஜ் பாண்டே உள்ளிட்டவர்கள் நடிக்க ஸ்ரீதேவியின் கணவர் போனி கபூர் தயாரித்துள்ளார். இன்றுடன் படம் வெளியாகி நான்கு நாள்கள் முடிந்த நிலையில் விமர்சன ரீதியாகவும் வசூல் ரீதியாகவும் நல்ல வரவேற்பைப் பெற்றுவருகிறது. பெண்கள் எதிர்கொள்ளும் பாலியல் சீண்டல்கள் குறித்து பேசியிருப்பதால் பெண்கள் மத்தியிலும் நல்ல வரவேற்பு கிடைத்து வருவதால் படக்குழு உற்சாகம் அடைந்துள்ளது. இதற்கிடையே, இந்தப் படத்தைப் பார்த்த திருநெல்வேலி காவல் துணை ஆணையர் அர்ஜுன் சரவணனின் ஃபேஸ்புக் பதிவு தற்போது வைரலாகி வருகிறது.

அஜித்குமார்
அஜித்குமார்

படத்தைப் பார்த்த துணை ஆணையர் அர்ஜுன் `நேர்கொண்ட பார்வையும் `காவலனுக்கான' தேவையும்!' என்று பதிவிட்டுள்ள அந்தப் பதிவில், ``நடிகர் அஜித்குமார் நடித்த நேர்கொண்ட பார்வை திரைப்படம் பார்க்கும் வாய்ப்பு கிட்டியது. அனைத்து துறைகளிலும் மிக வேகமாக முன்னேறி வரும் பெண்கள், தங்கள் வாழ்வில் எதிர்கொள்ளும் பாலியல் சீண்டல்கள் மற்றும் அவர்களின் பாதுகாப்பு தொடர்பான பிரச்னைகளை சட்டத்தின் துணையுடன் எவ்வாறு எதிர்கொள்வது என்பதை நன்கு விளக்கி, திரைப்படத்தைப் பார்க்கும் அனைவருக்கும் பல புதிய கருத்துகளை புகுத்தியுள்ளது இத்திரைப்படம்.

நடிகர் அஜித்குமார் அவர்களின் திரைப்பயணத்தில் இத்திரைப்படம் புதிய மைல்கல் என்றே சொல்லலாம். பத்திரிகையாளர் ரங்கராஜ் பாண்டேவின் நடிப்பும் தொழில்நுட்ப கலைஞர்கள் பணியும் பாராட்டத்தக்கது. சட்டத்தை நிலை நிறுத்துவதில் வழக்கறிஞர்களின் கடமையை இயக்குநர் ஹெச்.வினோத் சிறப்பாகச் சுட்டிக்காட்டியுள்ளார். சமூக அக்கறையுள்ள இயக்குநர்களின் வரிசையில், இவர் முன் வரிசையில் அமர்ந்துவிட்டார்" எனக் கூறியதுடன், `பெண்களின் பாதுகாப்பை மேலும் உறுதிசெய்ய தமிழக காவல்துறை மேற்கொண்டு வரும் தொடர் நடவடிக்கைகள் குறித்தும் பேசியுள்ளார்.

அஜித்குமார் - ஹெச்.வினோத்
அஜித்குமார் - ஹெச்.வினோத்

🎯 பெண்கள் பாதுகாப்புக்காகத் தமிழக காவல்துறை KAVALAN SOS என்ற செயலியை அறிமுகம் செய்துள்ளது. இதைப் பதிவிறக்கம் செய்வதன் மூலம் எந்த ஒரு அவசர நிலையிலும் ஒரு க்ளிக் மூலம் காவல்துறை உதவியைப் பெற முடியும். மேலும், நீங்கள் தேர்ந்தெடுக்கும் 5 பேருக்கும் அவசர உதவி கோரி குறுந்தகவல் செல்லும்.

🎯 பெண்களுக்கு எதிரான குற்றங்களில் பாதிக்கப்பட்ட பெண்களின் பெயரையோ புகைப்படத்தையோ காவல்துறை மற்றும் ஊடகங்கள் வெளியிட தடை உள்ளது. பெயர் மற்றும் புகைப்படம் வெளியாகும் என்று எண்ணியே பலர் புகார் அளிப்பதில்லை.

🎯 குழந்தைகளுக்கெதிரான வழக்குகளில் மரணதண்டனை அளிக்கும் போக்ஸோ சட்டம் ( Protection of Children from Sexual Offences Act) நிறைவேற்றியுள்ளது. இவ்வழக்குகளில் ஜாமீன் கிடைப்பதும் கடினம்.

🎯 தமிழகத்தின் அனைத்து மாவட்டங்களிலும் கூடுதல் காவல் கண்காணிப்பாளர் தலைமையில் பெண்களுக்கு எதிரான குற்றங்களை (Crime against women) விசாரிக்க தனிப்பிரிவு செயல்படுகிறது.

🎯அனைத்துக் காவல் நிலையங்களிலும் சீருடை அணியாத குழந்தை நல அலுவலர்கள் (Child friendly Police officers) பணியில் உள்ளனர்.

துணை ஆணையர் அர்ஜூன் சரவணன்
துணை ஆணையர் அர்ஜூன் சரவணன்

பெண்களுக்கு எதிரான குற்றங்களில் பாதிக்கப்பட்டவர் யார், எவர், அவரது பின்னணி மற்றும் சூழல் பார்க்காமல் அவர்கள் அனுமதியில்லாமல் நடக்கும் எதுவும் குற்றமே என்ற அழுத்தமான செய்தியை லட்சக்கணக்கான ரசிகர்களைக் கொண்ட அஜித்குமார் போன்றோர் கூறும்போது ஏராளமானோரை சென்றடையும். பெண் குழந்தைகள் எப்படி இருக்க வேண்டும் என்று சொல்வதைவிட, ஆண் குழந்தைகள் அவர்களை எப்படி மதிக்க வேண்டும் என்று சொல்லி வளர்ப்பதே தற்போதைய தேவை. `நேர்கொண்டபார்வை இக்காலத் தேவை' " எனக் காவல் ஆணையர் பாராட்டியுள்ளது தற்போது வைரலாகி வருகிறது.