சினிமா
Published:Updated:

வணக்கம்டா மாப்ள - சினிமா விமர்சனம்

வணக்கம்டா மாப்ள - சினிமா விமர்சனம்
பிரீமியம் ஸ்டோரி
News
வணக்கம்டா மாப்ள - சினிமா விமர்சனம்

நகைச்சுவை டெம்ப்ளேட்டில் அப்படியே பொருந்திவிடும் இயல்பு ஜி.வி. பிரகாஷுக்கு.

சமூகவலைதளங்களின் வருகைக்குப் பின் காமெடி எனும் ஜானர் புலிப்பாய்ச்சலில் அப்டேட் ஆகிக்கொண்டே இருக்கிறது. அதில் பின்தங்கிவிட்டால் என்னவாகும் என்பதற்கு சரியான உதாரணம் இந்த ‘வணக்கம்டா மாப்ள.’

சிறுவயதிலிருந்தே ஜி.வி. பிரகாஷும் டேனியல் போப்பும் நண்பர்கள். இரண்டு பேரும் தங்களுக்குப் பிடித்தமான பெண்களைத் தேடிக் கண்டுபிடித்து ஒரே மேடையில் திருமணம் செய்துகொள்வோம் எனக் கல்லூரி நண்பர்களிடம் சூளுரைக்கிறார்கள். அதன்பின் ஜி.வி. பிரகாஷ் கப்பல் வேலைக்குச் சென்றுவிட, இங்கே டேனியலுக்கு முறைப் பெண்ணைத் திருமணம் செய்து வைக்க ஏற்பாடுகள் நடக்கின்றன. திரும்பிவரும் ஜி.வி இந்த விவகாரம் அறிந்து நண்பனின் திருமணத்தைத் தள்ளிப்போட வைக்கிறார். சபதத்தை நிறைவேற்ற ஜி.வி-க்கு இருவரும் சேர்ந்து பெண் தேடுவதே மீதிக்கதை.

நகைச்சுவை டெம்ப்ளேட்டில் அப்படியே பொருந்திவிடும் இயல்பு ஜி.வி. பிரகாஷுக்கு. இதிலும் தன்னால் முடிந்த அளவிற்குப் படத்தைத் தூக்கிப்பிடிக்க முயல்கிறார். ஆனால் வசனங்களில், காட்சிகளில் இருக்கும் காமெடிப் பற்றாக்குறை அம்முயற்சிகளையும் தாண்டி வெளியே தெரிகிறது. படம் முழுக்க நண்பனாக வரும் டேனியல் ஒன்றிரண்டு காட்சிகளில் மட்டுமே சிரிக்க வைக்கிறார். இரண்டே காட்சிகள் என்றாலும் யோகி பாபு சிரிப்பிற்கு கியாரன்டி. இரண்டாம்பாதி முழுக்க காமெடி ஏரியாவைக் குத்தகைக்கு எடுத்துக்கொள்கிறார் ஆனந்தராஜ். இவர்கள் இருவரும்தான் இதைக் காமெடிப்படம் என ஓரளவிற்கு நம்ப வைக்கிறார்கள்.

வணக்கம்டா மாப்ள - சினிமா விமர்சனம்

ஹீரோயின் அம்ரிதாவுக்கு பெரிதாக வேலையில்லை. தம்பதியராக வரும் ஜெயப்பிரகாஷ் - பிரகதி இருவரின் கதையையும் இன்னமும் கனமாகப் படைத்திருந்தால் படம் காமெடி தாண்டியும் உணர்ச்சிகளைக் கடத்தியிருக்கும்.

ஜி.வி-யா இசை என்கிற அளவில்தான் இருக்கின்றன பாடல்களும் பின்னணி இசையும். சித்தார்த் ரங்கநாதனின் ஒளிப்பதிவு ஓகே ரகம்.

‘பொண்ணுங்கனாலே ஏமாத்திட்டுப் போய்டுவாங்க’ என்கிற அரதப்பழைய கான்செப்ட்டிலிருந்து எப்போது இயக்குநர் ராஜேஷ் விடுபடப்போகிறார் எனத் தெரிய வில்லை. 160 நிமிடப் படத்தில் கிட்டத்தட்ட முதல் 90 நிமிடங்கள் படம் எதை நோக்கி நகர்கிறது என்கிற தெளிவே இல்லாமல் காட்சிக்கு மேல் காட்சியாக அடுக்கப்பட்டிருப்பதால் ஓடிடியில்தான் என்றாலுமே பொறுமையைச் சோதிக்கிறது.

வணக்கம்டா மாப்ள - சினிமா விமர்சனம்

என்னமோ செய்து இரண்டு மணிநேரத்தைக் கடத்தி அதன்பின் வலிந்து இரண்டு ட்விஸ்ட்களைத் திணிப்பது, துணை தேடும் படலத்தையே கேலிக்கூத்தாக்குவது, இன்னமும் பெண்களை முன்வைத்தே மலின நகைச்சுவை செய்வது ஆகியவற்றையெல்லாம் விடுத்து இயக்குநர் அப்டேட் ஆக வேண்டியது அவருக்கும் நல்லது, தமிழ் சினிமாவிற்கும் நல்லது.